Душанбе, 26 ноябр, – АИ Корвон Иттилоот. Дар Душанбе 25 ноябр вохӯрии Вазири корҳои хориҷии Ҷумҳурии Тоҷикистон Сиродҷиддин Муҳриддин бо фиристодаи махсуси Вазири корҳои хориҷии Ҷумҳурии Корея Ли Ук Ҳён баргузор гардид. Суҳбатҳо ба густариши ҳамкории дуҷониба ва омодагӣ ба нахустин Саммити сарони давлатҳои Форуми ҳамкорӣ «Осиёи Марказӣ – Ҷумҳурии Корея», ки соли 2026 баргузор мешавад, равона гардиданд.

Зимни мулоқот ҷонибҳо вазъи кунунӣ ва дурнамои инкишофи муносибатҳои дуҷонибаро баррасӣ намуда, ба пешбурди лоиҳаҳои иҷтимоию иқтисодӣ дар бахшҳои саноат, рақамикунонӣ, энергетика ва маориф таваҷҷуҳи хос зоҳир карданд.

Ҷумҳурии Корея кишварҳои Осиёи Марказиро ҳамчун гиреҳгоҳи муҳими ҳамкории евроосиёӣ арзёбӣ мекунад ва Тоҷикистон яке аз шарикони умдаи он дар самти рушди устувор ба шумор меравад.

Форуми «Осиёи Марказӣ – Ҷумҳурии Корея», ки зиёда аз даҳ сол фаъолият дорад, барои нахустин бор ба сатҳи мулоқоти сарони давлатҳо мегузарад. Ин иқдом далели таваҷҷуҳи стратегӣ аз ҷониби Сеул ва талоши кишварҳои минтақа барои тақвияти мавқеи ягона дар муносибат бо шарикони ҷаҳонӣ мебошад.

Саммит барои қабули қарорҳои дарозмуддат дар самти тавсеаи ҳамкориҳои иқтисодию тиҷоратӣ, рушду ҷорӣ намудани технологияҳои сабз ва рақамӣ, тақвияти робитаҳои гуманитарӣ, баланд бардоштани устувории занҷираҳои нақлиётиву логистикӣ, иштироки муштарак дар ташаббусҳои минтақавӣ ва ҷаҳонӣ замина фароҳам меорад.

Для Тоҷикистон ин саммит имкониятҳои нав мекушояд, аз ҷумла ҷалби сармоя ва технологияҳои Корея, тавсеаи содирот, рушди лоиҳаҳои инфрасохторӣ ва маориф, тақвияти мавқеи кишвар дар меъмории нави ҳамкории минтақавӣ.

Формати «Осиёи Марказӣ – Ҷумҳурии Корея» яке аз майдонҳои фаъоли ҳамкории байниминтақавӣ ба шумор меравад. Гузариш ба сатҳи сарони давлатҳо аҳамияти сиёсӣ ва иқтисодии минтақа, инчунин таваҷҷуҳи афзояндаи шарикони байналмилалиро боз ҳам равшантар мегардонад.

АКС: Вазорати корҳои хориҷии Ҷумҳурии Тоҷикистон