Душанбе, 20 ноябр, – АИ Корвон Иттилоот. 15 ноябр раиси Вилояти Мухтори Кӯҳистони Бадахшон Мирзонабот Алишер Худобердӣ дар деҳаи Руботи ҷамоати деҳоти Сежд пули нави мошингузарро ба истифода супориданд. Ин иншоот, ки ду соҳили дарёро ба ҳам пайваст, барои сокинон лоиҳаи деринтизор ба шумор мерафт.

Корҳои сохтмонӣ дар пули мазкур аввали соли ҷорӣ оғоз гардида буданд ва дар муҳлати муайян бо сифати баланд анҷом ёфтанд. Дарозии ин иншоот 18 метр буда, ба истифода додани он роҳро то деҳаи Ҷавшангоз 10 километр кӯтоҳ намуд.

Сохтмонро кормандони Муассисаи давлатии «Идораи хоҷагии роҳҳои автомобилгард»-и ВМКБ иҷро карданд, ки бо вуҷуди шароити душвори кӯҳӣ корҳои босифатро таъмин намуданд.

Раиси вилоят зимни ифтитоҳи объект сокинонро бо Рӯзи Президенти Ҷумҳурии Тоҷикистон ва Рӯзи Парчами давлатӣ табрик намуда, таъкид намуданд, ки ба истифода супоридани ин пул дар арафаи чунин санаҳои таърихӣ туҳфаи арзандаи Ҳукумати кишвар ба сокинони Роштқалъа мебошад.

Зикр гардид, ки пул имконияти рафтуомади осону бехатарро фароҳам оварда, ҳамлу нақли молу маҳсулотро содда мекунад ва робитаҳои иҷтимоию иқтисодии байни деҳаҳоро тақвият мебахшад.

Сокинони деҳаи Рубот аз бунёди ин пули муҳиму зарурӣ изҳори хушнудӣ намуда, ба Ҳукумати Ҷумҳурии Тоҷикистон ва Пешвои миллат муҳтарам Эмомалӣ Раҳмон изҳори миннатдорӣ карданд. Ба гуфтаи онҳо, ин пул роҳи ҳалли мушкилоти солҳои зиёд рушдёфта буда, имкониятҳои нав барои пешрафти минтақа фароҳам меорад.

Ин навсозӣ ба ҳайси яке аз лоиҳаҳои муҳими инфрасохторӣ дар ноҳия арзёбӣ шуда, барои солҳои тӯлонӣ ба манфиати сокинон хизмат хоҳад кард.

АКС: АИ «Корвон Иттилоот».