Душанбе, 14 ноябр, – АИ «Корвон Иттилоот». Дар пойтахти Тоҷикистон, 13 ноябр дар доираи Ҷаласаи тирамоҳии Ассамблеяи байнипарлумонии давлатҳои иштирокчии Иттиҳоди Давлатҳои Мустақил (ИДМ), ҷаласаи Комиссияи доимии Ассамблеяи байнипарлумонӣ оид ба масоили ҳуқуқӣ баргузор гардид.

Дар ҷаласа ҳайатҳои парлумонии Тоҷикистон, Россия, Озарбойҷон, Арманистон, Беларус, Узбекистон, Қирғизистон ва Қазоқистон иштирок намуданд.

Ҷаласаро Рустам Шохмурод, раиси Кумитаи Маҷлиси намояндагон Маджлиси Олии Ҷумҳурии Тоҷикистон оид ба қонунгузорӣ ва ҳуқуқи инсон, раисӣ намуд.

Иштирокдорони ҷаласа лоиҳаҳои қонунҳои намунавии «Дар бораи шартномаҳои истифодаи молу мулк», «Дар бораи иҷрои корҳо ва хизматрасониҳо», «Дар бораи шартномаи парасторӣ», «Дар бораи шартномаҳои миёнҷигарӣ», ва инчунин «Дар бораи танзими ҳуқуқӣ оид ба мубориза бо зӯроварии хонаводагӣ»-ро баррасӣ намуданд.

Ҳамзамон, таваҷҷуҳи махсус ба таҳияи консепсияи лоиҳаи қонуни намунавӣ «Дар бораи платформаҳои рақамӣ ва истифодаи онҳо аз ҷониби иштирокчиёни муомилоти шаҳрвандӣ» зоҳир карда шуд, ки тамоюлҳои навтарин дар рақамисозии ҳуқуқ ва иқтисодро инъикос менамояд.

Дар ҷараёни ҷаласа таъкид гардид, ки фаъолияти мунтазами Ассамблеяи байнипарлумонии ИДМ ба ҳамоҳангсозӣ ва наздикшавии қонунгузории миллӣ, таҳияи муносибатҳои ҳуқуқии умумӣ ва тақвияти ҳамкории ҳуқуқӣ дар минтақа мусоидат мекунад.

Чунончи иштирокдорони Комиссияи доимӣ қайд карданд, давлатҳои узви ИДМ дар давраи раёсати Ҷумҳурии Тоҷикистон дар Иттиҳоди Давлатҳои Мустақил дар соли 2025 тадбирҳои устуворро амалӣ карда истодаанд, ки ба густариши ҳамкории байнипарлумонӣ, таҳкими заминаҳои ҳуқуқӣ ва устувории амният дар минтақа равона мебошанд.

Дар анҷоми ҷаласа иштирокдорони он омодагии худро барои идомаи ҳамкории муштарак дар самти ягонасозии қонунгузорӣ, мубодилаи таҷрибаи қонунгузорӣ ва танзими ҳуқуқӣ дар соҳаҳои нав — аз иқтисоди рақамӣ то ҳифзи ҳуқуқи инсон — таъкид карданд.

АКС: АИ «Корвон Иттилоот»