Душанбе, 13 ноябр, – АИ «Корвон Иттилоот». Дар Донишгоҳи технологии Тоҷикистон маросими ифтитоҳи Рӯзҳои робототехника, технологияҳои инноватсионии таълимӣ ва информатика баргузор гардид, ки онро Россотрудничество ва Донишгоҳи давлатии Астрахани ба номи В.Н. Татищев ташкил намуданд.

Дар чорабинӣ беш аз 300 хонанда ва 70 омӯзгор — муаллимони фанҳои физика, математика ва информатика аз шаҳру ноҳияҳои ҷумҳурӣ иштирок доранд.

Сардори намояндагии Россотрудничество дар Тоҷикистон Андрей Патрушев изҳор дошт, ки чунин чорабиниҳо дорои аҳамияти байналмилалӣ мебошанд:

«Барои омӯзгороне, ки фанҳои дақиқро ба забони русӣ меомӯзонанд, барномаҳои такмили ихтисос омода гардидаанд. Ин иқдом барои рушди малакаҳои техникии хонандагон ва омӯзгорон хеле муҳим аст».

Ректори Донишгоҳи технологии Тоҷикистон Зоир Файзалӣ Раҳмонзода таъкид намуд:

«Рӯзҳои робототехника ва технологияҳои инноватсионӣ ба рушди таҳсилоти муҳандисӣ ва ташвиқи илм миёни ҷавонон мусоидат мекунанд. Онҳо шароити мусоиди мубодилаи таҷриба ва таҳкими ҳамкории илмӣ миёни Тоҷикистону Русияро фароҳам меоранд».

Директори Институти рушди маорифи ба номи Абдураҳмони Ҷомӣ Сироҷиддин Ниезӣ чунин иброз дошт:

«Ин рӯзҳо на танҳо як чорабинии таълимӣ, балки ҷашни илм ва технология мебошанд. Онҳо ба ҷавонон имкон медиҳанд, ки андешаи эҷодии худро рушд диҳанд ва ба ҷаҳони рақамӣ мутобиқ шаванд».

Сардори Раёсати маорифи шаҳри Душанбе Исмоилзода Баҳром Мансур гуфт, ки чунин чорабиниҳо ҳамкории муассисаҳои таълимии пойтахтро бо муассисаҳои Русия тақвият мебахшанд ва ба таҷрибаомӯзии муаллимон ва татбиқи технологияҳои рақамӣ мусоидат мекунанд.

Декани факултети физика, математика ва технологияҳои муҳандисии Донишгоҳи давлатии Астрахан Алфия Валишева гуфт:

«Барномаи ин рӯзҳо ба пешбурди таҳсилоти муҳандисии русӣ ва ҷалби ҷавонони боистеъдод барои таҳсил дар Русия равона шудааст».

Рӯзҳои робототехника ва технологияҳои инноватсионии таълимӣ аз 12 то 21 ноябр дар Душанбе, Турсунзода, Бохтар ва Кӯлоб баргузор мешаванд.
Барнома дар бар мегирад:

• машғулиятҳои таълимии робототехника, физика ва математика барои хонандагони синфҳои 5–11;
• курсҳои такмили ихтисос барои омӯзгорон оид ба ташкили маҳфилҳои фанҳои дақиқ ва инноватсионӣ.

Дар анҷом хонандагон шаҳодатномаҳои иштирок, ва омӯзгорон ҳуҷҷатҳои такмили ихтисос-и намунаи Федератсияи Русияро дарёфт мекунанд.

Ин чорабинӣ рамзи тақвияти робитаҳои илмӣ ва таълимӣ байни Тоҷикистону Русия ва рушди малакаҳои зеҳнии ҷавонон дар замони технологияҳои рақамӣ мебошад.

АКС: Хонаи русӣ дар Душанбе