Душанбе, 12 ноябр, – АИ «Корвон Иттилоот». Дар шаҳри Маскав бо ташаббуси Ҳизби Халқии Демократии Тоҷикистон ва бо дастгирии Сафорати Тоҷикистон чорабинии фарҳангӣ ба муносибати Рӯзи Президенти Тоҷикистон баргузор гардид.
Дар чорабинии “Шоми Дӯстӣ” намояндагони сиёсат, фарҳанг ва ҷомеаи шаҳрвандӣ аз Тоҷикистону Русия ҷамъ омада, ҳамкории ду кишвар ва таҳкими муносибатҳои дуҷонибаро таҷлил карданд. Барнома ҳамзамон намоишҳои фарҳангӣ, асарҳои Пешвои миллат ва барномаи фароғатиро дар бар гирифт.
Сафири Тоҷикистон дар Русия, Гулмаҳмадзода Давлатшо, чорабинӣ оғоз намуда, оид ба густариши муносибатҳои дӯстонаи Тоҷикистону Русия суханронӣ кард. Ӯ таъкид намуд, ки чунин ҳамоишҳо барои тақвияти ҳамкориҳо ва дӯстии байни ду кишвар аҳамияти хос доранд.
Дар чорабинӣ намояндагони фаъоли Шӯрои Ҷамъиятии назди Сафорати Тоҷикистон, ҳамватанони бурунмарзӣ, аҳли илму фарҳанг, олимон, шоирон ва таърихнигорон иштирок карданд. Ҳамзамон, роҳбарияти Ҳизби “Единая Россия” ва вакилони Думаи давлатии Федератсияи Русия низ ҳузур доштанд.
Қабулгоҳи ҷамъиятии ҲХДТ дар Москва намоиши ҳунарҳои миллӣ ва мардумӣ, либосҳои анъанавӣ, китобҳо ва асарҳои Пешвои миллат муҳтарам Эмомалӣ Раҳмонро ба намоиш гузошт.
Маликшо Неъматзода, муовини якуми Раиси Ҳизби Халқии Демократии Тоҷикистон, зимни суханронӣ ба хизматҳои арзанда ва талошҳои пайвастаи Пешвои миллат дар таҳкими давлатдории миллӣ, сулҳ ва ваҳдати миллӣ ишора намуда, таъкид кард, ки роҳбарии оқилона ва заҳматҳои шабонарӯзии Президенти кишвар Тоҷикистонро аз кишвари пасошӯравӣ ба давлати устувор ва рушдёбанда табдил дод.
Ҳамзамон, ба сафари давлатии Президенти Федератсияи Русия ба Тоҷикистон ишора шуда, таъкид гардид, ки ҲХДТ барои вусъат бахшидани ҳамкориҳои дуҷониба бо кишварҳои дуру наздик, бахусус бо Русия, фаъолона талош меварзад.
Климов Андрей, аъзои Шӯрои сиёсии ҳизби “Единая Россия”, суханронӣ намуда, иброз дошт, ки аз соли 2017 байни ҲХДТ ва “Единая Россия” Созишномаи ҳамкорӣ ва дӯстӣ амал мекунад ва ҳамкории мутақобилан судманд дар бахшҳои гуногуни ҷомеа амалӣ мебошад.
Дар қисмати ниҳоӣ, барои меҳмонон барномаи фарҳангӣ ва зиёфати идона ташкил шуда, бо суруду рақсу навои миллӣ фазои тантанавӣ фароҳам оварда шуд.
АКС Сафорати Тоҷикистон дар Русия