Душанбе, 12 ноябр, – АИ «Корвон Иттилоот». Дар толори кӯдаконаи Қасри фарҳанги шаҳри Бӯстон (вилояти Суғд) маросими ифтитоҳи Маркази дуюми захиравии «Русия бо шумост» баргузор гардид. Ин марказ аввалин дар шимоли кишвар ва дуюмин дар миқёси ҷумҳурӣ ба ҳисоб меравад.

Дар чорабинӣ намояндагони ҳукумати шаҳр, омӯзгорон, ҳамватанон ва Сергей Вольф, муовини консули генералии Федератсияи Русия дар шаҳри Хуҷанд, иштирок намуданд.

Марказ бо мебелҳои муосири ширкати Belsi ва таҷҳизоти истеҳсоли Русия муҷаҳҳаз шудааст. Дар ин ҷо шароити мусоид барои гузаронидани лексияҳо, мастер-классҳо, мулоқотҳои мавзӯӣ, курсҳои такмили ихтисос ва машғулиятҳои рушди зеҳнӣ фароҳам оварда шудааст.

Барои кӯдакони то 12-сола майдони алоҳида бо китобҳо, қаламҳои «говарондаи» Знаток, мизи интерактивӣ, плакатҳои электронӣ ва конструкторҳои омӯзишӣ таъсис дода шудааст. Барои чорабиниҳои онлайнӣ системаҳои муосири видеоконфронс ва панели интерактивии NexTouch насб гардидааст.

Сардори намояндагии Россотрудничество дар Тоҷикистон Андрей Патрушев дар суханронии худ зикр намуд, ки ҳадафи асосии таъсиси марказ кумак ба ҷавонони фаъол ва эҷодкори Бӯстон дар рушди қобилиятҳои онҳо мебошад:

«Мо мехоҳем фазое эҷод кунем, ки ҷавонон дар он хонанд, омӯзанд, рушд кунанд ва вақти холии худро бо фоида сипарӣ намоянд».

Раиси шаҳри Бӯстон Фирӯза Нуррӯззода фаъолияти марказро барои густариши ҳамкориҳои фарҳангӣ ва таълимӣ муҳим арзёбӣ кард:

«Бовар дорам, ки фаъолияти марказ ба таҳкими робитаҳои гуманитарӣ, рушди ҳамкориҳои фарҳангӣ ва татбиқи лоиҳаҳои муштараки таълимӣ мусоидат хоҳад кард, инчунин барои онҳое, ки мехоҳанд забони русиро омӯзанд ва ҷаҳонбинии худро васеъ кунанд, шароити нав фароҳам меорад».

Директори Ширкати ғайритиҷоратии «Ассотсиатсияи иштирокчиёни бозори саноати ҳунар» Татяна Коринец меҳмононро бо фазои навсозишудаи марказ шинос намуд. Ҳамзамон Алексей Рогатнев, роҳбари Департаменти ҳамкориҳои байналмилалии NexTouch Innovation Lab, имкониятҳои техникии таҷҳизоти насбшударо муаррифӣ кард.

Меҳмонон изҳор доштанд, ки маркази «Русия бо шумо» ба минбари муҳими ҳамгироии таълим, эҷод ва технологияҳои муосир табдил меёбад ва барои рушди маънавию фарҳангии насли ҷавони вилояти Суғд имкониятҳои васеъ фароҳам меорад.

Лоиҳа аз ҷониби Россотрудничество дар ҳамкорӣ бо Ширкати ғайритиҷоратии «Ассотсиатсияи иштирокчиёни бозори саноати ҳунар» амалӣ гардидааст.

АКС: Хонаи русӣ дар  Хуҷанд