Душанбе, 11 ноябр, – АИ «Корвон Иттилоот». Дар пойтахти Тоҷикистон 10 ноябр мусобиқаи ҷумҳуриявии кӯдаконаи футбол таҳти унвони «Оянда аз имрӯз оғоз меёбад» ба анҷом расид. Ин лоиҳаи бузурги варзишӣ беш аз 1 600 футболбозони наврасро аз ҳашт шаҳри мамлакат муттаҳид намуд.
Ташкилкунандагони он — Лигаи футболи кӯдакон ва наврасони Тоҷикистон (ЛФКНТ)
Бозиҳо дар шаҳру ноҳияҳои Ашт, Бохтар, Ваҳдат, Душанбе, Кӯлоб, Хоруғ, Хуҷанд ва Шаҳринав баргузор шуданд. Барои ҳазорҳо кӯдак ин мусобиқа на танҳо озмун, балки ҷашни ҳақиқии футбол гардид.
Дар тамоми минтақаҳо фестивалҳои варзишӣ бо бозиҳои намоишӣ, эстафетаҳо ва дидорбиниҳои дӯстона доир шуданд. Ҳар як иштирокчӣ тӯби футбол ва туҳфаҳои ёдгорӣ гирифт, ва муҳити идона кӯдакон, волидон ва мураббиёнро ба ҳам овард.
Финали мусобиқа дар шаҳри Душанбе баргузор гардид ва бо пирӯзии бошукӯҳи дастаи «Солор» анҷом ёфт, ки дар бозии ҳалкунанда бо ҳисоби 11:0 рақибашро шикаст дод.
Аммо дастоварди асосии ин мусобиқа на танҳо ғалаба, балки дӯстӣ ва эҳтироми байни кӯдакон буд. Футболбозони наврас якдигарро табрик карда, орзуҳояшонро нақл намуданд ва рӯҳияи ҳамдигарро боло мебурданд.
Беҳтарин нишонзани мусобиқа Саид Бобоев аз дастаи «Солор» дониста шуд, ки шаш гол зад. Беҳтарин бозингар бошад, Эсо Баҳриддинзода аз дастаи «Насл» гардид.
«Мо бо ифтихор лоиҳаҳоро дастгирӣ мекунем, ки ба кӯдакон имкон медиҳанд қобилият ва боварии худро рушд диҳанд. Дар симои ин кӯдакон мо ояндаи футболи Тоҷикистонро мебинем. Ин мусобиқа нишон дод, ки рӯҳи қавӣ, ҳамдастӣ ва орзуи пешрафт аз кӯдакон роҳбарони ояндаро месозад», — гуфт директори генералии «МегаФон Тоҷикистон» Анатолий Изюмников.
Директори ЛФКНТ Абдулло Сокиев низ илова намуд:
«Дар рафти мусобиқа мо теъдоди зиёди кӯдакони болаёқатро дидем. Чунин чорабиниҳо танҳо мусобиқа нестанд — онҳо қадаме ба сӯи насли солим ва фаъол мебошанд. Мо якҷо рушди футболи кӯдакону наврасонро идома медиҳем».
Лоиҳаи «Оянда аз имрӯз оғоз меёбад» ба рамзи умед ба насли ҷавон табдил ёфтааст. Он рушди варзиши оммавиро тақвият мебахшад ва кӯдаконро ба орзу кардан, заҳмат кашидан ва ба худ бовар кардан меомӯзонад.
Ҳамин тавр, ояндаи футболи тоҷик аз имрӯз, аз замини сабз ва қадамҳои нахустини ин варзишгарони хурд оғоз меёбад.
АКС: Лигаи футболи кӯдакон ва наврасони Тоҷикистон (ЛФКНТ)