Душанбе, 12 декабр, 2025г. – АИ «Корвон Иттилоот». 9 декабри соли 2025 дар шаҳри Ню-Деҳлии Ҳиндустон барои дипломатияи фарҳангии Тоҷикистон рӯзномаи муҳим гардид. Кумитаи байниҳукуматӣ оид ба ҳифзи мероси ғайримоддии фарҳангии ЮНЕСКО Ҳисоботи Даврии Ҷумҳурии Тоҷикистонро оид ба иҷрои Конвенсияи соли 2003 ва вазъи кунунии унсурҳои шомилшуда ба Рӯйхати намояндагии ЮНЕСКО расман тасдиқ намуд.
Тибқи иттилои Вазорати корҳои хориҷии Тоҷикистон, ҳисобот аз ҷониби Кумита баҳои баланд гирифт. Мутахассисони ЮНЕСКО фаъолияти Тоҷикистонро дар самти ҳифз, таҳқиқ ва тарғиби мероси фарҳангӣ намунавӣ арзёбӣ намуда, таъкид карданд, ки кишвар ӯҳдадориҳои байналмилалии худро пайгирона иҷро менамояд.
Ҳисобот дар ҷаласаи 20-уми Кумитаи байниҳукуматӣ, ки аз 8 то 13 декабр дар Ню-Деҳлӣ баргузор мешавад, мавриди баррасӣ қарор гирифта, ҳамчун ҳуҷҷати намунавӣ барои дигар кишварҳо тавсия шуд.
Солҳои охир Тоҷикистон сиёсати устуворро дар ҳифз ва эҳёи арзишҳои маънавӣ пеш мебарад. Наврӯз, Фалак, Шашмакам, Чакан ва дигар унсурҳои фарҳангӣ ба Рӯйхати ЮНЕСКО дохил карда шуданд, ки ин нишонаи талошҳои пайвастаи кишвар дар ҳифзи мероси мардумӣ мебошад.
Олимон ва коршиносон зикр мекунанд, ки ҳамкории ниҳодҳои давлатӣ, муассисаҳои илмӣ, созмонҳои эҷодӣ ва ҷамоатҳои маҳаллӣ дар ин раванд густариш ёфта, ба ҳуҷҷатгузорӣ ва интиқоли анъанаҳо ба насли нав мусоидат мекунад.
Ҳисоботи мавриди баҳодиҳӣ на танҳо як расмият, балки санади муҳимест, ки нишон медиҳад:
- сатҳи иҷрои Конвенсияи соли 2003 дар Тоҷикистон,
- вазъи ҳифзи расму оинҳо, ҳунарҳои мардумӣ ва мусиқии суннатӣ,
- тадбирҳои давлатӣ барои нигоҳдории мероси зиндаи фарҳангӣ,
- иштироки ҷамоатҳои соҳибони унсурҳо дар раванди ҳифз.
Тасдиқи ҳуҷҷат ҳамчун намунаи беҳтарин мавқеи байналмилалии Тоҷикистонро тақвият дода, имкониятҳои навро барои иштирок дар барномаҳои глобалии фарҳангӣ фароҳам месозад.
АКС: Вазорати корҳои хориҷии Тоҷикистон