Душанбе, 19 декабр, 2025 – АИ «Корвон Иттилоот». 18 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо сафари расмӣ ба шаҳри Токио — пойтахти Ҷопон сафар карданд. Дар доираи ин сафар Сарвари давлат дар Саммити Муколамаи «Осиёи Марказӣ – Ҷопон» иштирок менамоянд. Ин сафар ҳамчун қадами муҳим дар роҳи густариши муносибатҳои дуҷониба ва таҳкими ҳамкориҳои бисёрҷониба арзёбӣ мегардад.
Президенти Ҷумҳурии Тоҷикистон аз Фурудгоҳи байналмилалии Душанбе сафар карданд. Дар маросими гусел Раиси Маҷлиси милли Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, муовини якуми Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ иштирок намуданд.
Иштироки Президенти Тоҷикистон дар Саммити Муколамаи «Осиёи Марказӣ – Ҷопон» аҳамияти махсус дорад. Ин формат дар тӯли солҳои фаъолияти худ ҳамчун майдони муассир барои баррасии масъалаҳои рушди устувор, ҳамкориҳои иқтисодӣ, лоиҳаҳои инфрасохторӣ, сармоягузорӣ, нақлиёт, энергетика ва рушди захираҳои инсонӣ шинохта шудааст.
Дар ҷараёни саммит масъалаҳои густариши ҳамкориҳои кишварҳои Осиёи Марказӣ бо Ҷопон, инчунин нақши Тоҷикистон дар равандҳои минтақавӣ, аз ҷумла амният ва ташаббусҳои фаромарзӣ, мавриди баррасӣ қарор хоҳанд гирифт.
Дар ҷараёни сафар Президенти Ҷумҳурии Тоҷикистонро ҳайати намояндагии сатҳи баланд ҳамроҳӣ мекунад. Ба ҳайат Вазири корҳои хориҷӣ, ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ, вазирони рушди иқтисод ва савдо, нақлиёт, саноат ва технологияҳои нав, маориф ва илм, инчунин Раиси Кумитаи давлатии сармоягузорӣ ва идораи амволи давлатӣ ва дигар шахсони расмӣ шомил мебошанд.
Ин таркиб аз равиши амалӣ ва иқтисодии сафар шаҳодат медиҳад, ки ба пешбурди лоиҳаҳои сармоягузорӣ, технологӣ, саноатӣ ва гуманитарӣ равона шудааст.
Сафари расмӣ ба Ҷопон идомаи сиёсати пайгиронаи Тоҷикистон ҷиҳати тақвияти робитаҳои байналмилалӣ, тавсеаи ҳамкорӣ бо кишварҳои дорои иқтисоди пешрафта ва иштироки фаъол дар форматҳои минтақавию байналмилалӣ мебошад.
Интизор меравад, ки сафари Президенти Ҷумҳурии Тоҷикистон муҳтарам Эмомалӣ Раҳмон ба Токио ба рушди минбаъдаи муколамаи Тоҷикистону Ҷопон ва татбиқи ташаббусҳои нав, ки ба манфиатҳои дарозмуддати кишвар ҷавобгӯ мебошанд, такони ҷиддӣ бахшад.
АКС: АМИТ «ХОВАР»