Душанбе, 20 декабр, 2025 – АИ «Корвон Иттилоот». 18 декабр дар Маркази тадқиқоти стратегии назди Президенти Ҷумҳурии Тоҷикистон конференсияи илмӣ-назариявии «Нақши мероси тамаддунҳои бостонӣ дар ташаккули давлатҳои миллии муосир» баргузор гардид. Дар ҳамоиш намояндагони ҷомеаи илмӣ, таҳлилгарон ва коршиносон иштирок намуданд.

Дар шароити тағйирёбии босуръати муҳити ҷаҳонӣ ва рақобати афзояндаи байналмилалӣ такя ба мероси тамаддунӣ ва таърихии ниёгон аҳаммияти хос пайдо мекунад. Ба таъкиди директори Маркази тадқиқоти стратегӣ Хайриддин Усмонзода, маҳз худшиносии таърихӣ ва тамаддунӣ яке аз омилҳои асосии устувории давлатҳои миллии муосир ба шумор меравад.

Иштирокчиёни конференсия зикр намуданд, ки ҷомеае, ки дарки воҳиди ҳувияти таърихию фарҳангии худро надорад, дар баробари чолишҳои беруна осебпазир мегардад. Барои Ҷумҳурии Тоҷикистон ин масъала аҳаммияти вижа дорад, зеро ташаккули ризоияти ҷамъиятӣ оид ба мансубияти таърихию тамаддунӣ яке аз пояҳои муҳими таҳкими давлатдории миллӣ маҳсуб меёбад.

Дар ҷараёни ҳамоиш ба Паёми Президенти Ҷумҳурии Тоҷикистон таваҷҷуҳи махсус зоҳир гардид. Таъкид шуд, ки Пешвои миллат бо пешниҳоди ташаббусҳои муҳим дар самти эҳё ва муаррифии мероси тамаддунӣ — аз ҷумла таъсиси Маркази тамаддуни ориёӣ ва Маркази байналмилалии Наврӯз — мавқеи равшани Тоҷикистонро ҳамчун вориси тамаддунҳои бостонӣ, аз ҷумла тамаддуни ориёӣ, муайян намудааст.

Ҳамчунин иштирокчиён аҳаммияти рамзӣ ва муҳтавойии эълон гардидани соли 2026 ҳамчун «Соли густариши ободонӣ ва созандагӣ, таҳкими худшиносии миллӣ ва худогоҳӣ»-ро таъкид карданд. Ин иқдом идомаи мантиқии сиёсати давлатӣ дар самти таҳкими ваҳдати умумимиллӣ, ҳифзи хотираи таърихӣ ва пояҳои маънавии ҷомеа арзёбӣ гардид.

Конференсия ба минбари муҳими табодули афкор табдил ёфт, ки дар он масъалаи истифодаи мероси таърихӣ ҳамчун манбаи рушд, таҳкими ҳамбастагии иҷтимоӣ ва шаклгирии модели устувори давлатдории миллӣ дар асри XXI мавриди баррасии амиқ қарор гирифт.

АКС: Маркази тадқиқоти стратегии назди Президенти Ҷумҳурии Тоҷикистон