Душанбе, 20 декабр, 2025 – АИ «Корвон Иттилоот».  Аз 17 то 24 декабр дар Ҷумҳурии Исломии Покистон Рӯзҳои фарҳанги Ҷумҳурии Тоҷикистон баргузор мегарданд — чорабинии муҳими гуманитарӣ, ки ба таҳкими робитаҳои фарҳангӣ ва рушди ҳамкориҳои дӯстона байни ду кишвар нигаронда шудааст.

Ба иттилои Вазорати фарҳанги Ҷумҳурии Тоҷикистон, дар доираи барномаи консертии ин рӯзҳо таронаҳо ва оҳангҳои миллии тоҷикӣ пешкаш мегарданд, ки таърихи ғанӣ, фарҳанги бостонӣ ва ҳувияти миллии халқи тоҷикро инъикос менамоянд.

17 декабр дар шаҳри Исломобод мулоқоти Вазири фарҳанги Ҷумҳурии Тоҷикистон бо Вазири фарҳанги Ҷумҳурии Исломии Покистон баргузор гардид. Дар ҷараёни вохӯрӣ ҷонибҳо масъалаҳои густариши ҳамкориҳои фарҳангӣ, таҳкими робитаҳо миёни муассисаҳои таълимӣ ва фарҳангӣ, омода намудани мутахассисони касбӣ ва мубодилаи таҷрибаро баррасӣ намуданд.

Таъкид гардид, ки фарҳанг метавонад заминаи устувор барои рушди муносибатҳои дарозмуддат ва эътимоднок байни Тоҷикистону Покистон гардад.

Рӯзҳои фарҳанги Тоҷикистон дар Покистон на танҳо муаррифии санъати миллӣ, балки қадами муҳими дипломатияи фарҳангӣ ба шумор рафта, ба таҳкими нуфузи байналмилалии кишвар ва рушди ҳамкориҳои минтақавӣ мусоидат мекунанд.

АКС: Вазорати фарҳанги Ҷумҳурии Тоҷикистон