Душанбе, 24 декабр, 2025 – АИ «Корвон Иттилоот». Клуби таърихӣ назди Россотрудничество дар шаҳри Хуҷанд самти фаъолияти худро густариш дода, ба кори худ равияи фарҳангиву маърифатиро илова намуд. Ин иқдом посухи мантиқӣ ба талаботи замон ва шавқу ҳаваси ҷавонон гардид — неруи асосие, ки ояндаи дурахшони Тоҷикистон аз он вобаста аст.

Аввалин чорабинии ташкилии клуб дар шакли нав 21 декабри соли 2025 баргузор шуд. Ба он ҷавонони эҷодкору фаъол ва бетараф набуда даъват гардиданд, ки самимона мехоҳанд зиндагии худро ва ҳаёти ҷавонони шаҳрро ҷолибтар, пурмазмунтар ва барои ҷомеа судманд гардонанд.

Роҳбари барномаҳои фарҳангиву маърифатии Клуби таърихӣ хатмкардаи ГИТИС, омӯзгори маҳорати саҳнавии мактаби «Ворисони илм» ва узви фаъоли клуб — Даниил Абдуллаев интихоб гардид. Таҷрибаи касбӣ ва иштироки фаъоли ӯ барои рушди минбаъдаи ин равия заминаи мустаҳкам фароҳам меорад.

Ташкилкунандагон қайд мекунанд, ки сатҳи таваҷҷуҳ ва самимияти ҷавонон аз интизориҳо ҳам бештар буд. Хусусан, далели он ки дар Хуҷанд ҷавонони тарбияёфта, фарҳангӣ, босавод ва ташаббускор ба воя мерасанд, боиси хушҳолӣ гардид.

Муошират чунон ҷолиб буд, ки иштирокчиён пай набурданд, чӣ гуна вақт сипарӣ шуд ва намехостанд аз ҳам ҷудо гарданд. Дар ҷараёни мулоқот масъалаҳои он баррасӣ шуданд, ки чӣ гуна зиндагиро бо рӯйдодҳои дурахшон ва хотирмон ғанӣ гардондан мумкин аст, рӯйдодҳое, ки ҳамзамон хусусияти тарбиявӣ ва маърифатӣ доранд. Ҷавонон бо дарки масъулият таъкид намуданд, ки насли наврас оинаи кишвар ва оила аст ва маҳз аз рӯйи рафтори онҳо дар бораи тамоми миллат хулоса мебаранд.

Чорабинӣ танҳо ба муҳокимаҳо маҳдуд нашуд. Ҷавонон фикру пешниҳодҳои худро баён карданд, мавзӯъҳои вохӯриҳои ояндаро баррасӣ намуданд, бозӣ карданд, суруд хонданд ва бо ҳам ошно шуданд. Хушоянд он буд, ки бисёре аз онҳо ҳамагӣ чанд соат пеш аз оғози чорабинӣ якдигарро намешинохтанд, вале худро як дастаи воҳид эҳсос мекарданд.

Масрура Сидикова бо пешниҳоди ғояҳои ҷолиб ва пешниҳоди майдони Маркази забонии «Дахр» барои баргузории чорабиниҳо аз ташаббус пуштибонӣ намуд. Барои фароҳам овардани фазои гарм ва бароҳат ташкилкунандагон ба қаҳвахонаи дӯстдошта ва дастаи Мушараф Сатторов изҳори сипос карданд.

Густариши фаъолияти Клуби таърихӣ барои ҷавонони Хуҷанд имкониятҳои нав мекушояд — барои худшиносӣ, муошират ва ҳамфикрӣ. Бо дарназардошти қадами аввал, метавон гуфт, ки дар пеши роҳ клубро лоиҳаҳои зиёди ҷолиб, судманд ва илҳомбахш интизоранд.

 АКС: Хонаи русӣ дар Хуҷанд