Душанбе, 22 январ, – АИ «Корвон Иттилоот». Тоҷикистон ва Чин равобити шарикии стратегии худро пайваста тақвият бахшида, ба бахшҳои калидии рушди устувор — энергетика ва захираҳои об — таваҷҷуҳи хос зоҳир менамоянд.

Маҳз ин самтҳо дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо Сафири Фавқулода ва Мухтори Ҷумҳурии Мардумии Чин дар Тоҷикистон Го Чжицзюн, ки имрӯз дар Душанбе баргузор гардид, дар маркази баррасӣ қарор доштанд.

Тавре аз Вазорати энергетика ва захираҳои оби Ҷумҳурии Тоҷикистон хабар доданд, дар ҷараёни мулоқот маҷмӯи масъалаҳои муҳими ҳамкории дуҷониба мавриди муҳокима қарор гирифт. Таваҷҷуҳи асосӣ ба рушд ва густариши ҳамкорӣ дар соҳаҳои энергетика ва захираҳои об, татбиқи лоиҳаҳои муштарак, ҷалби сармоягузорӣ, инчунин истифодаи таҷрибаи пешрафтаи ҷониби чинӣ дар рушди инфрасохтор ва технология равона карда шуд.

Дар мулоқот таъкид гардид, ки Чин яке аз шарикони муҳими стратегии Тоҷикистон ба ҳисоб меравад. Муносибатҳои ду кишвар дар солҳои охир бар пояи эътимоди мутақобил, эҳтироми ҳамдигар ва манфиатҳои умумӣ пайваста таҳким меёбанд.

Ба андешаи коршиносон, ҳамкорӣ дар соҳаҳои энергетика ва идоракунии захираҳои об дар шароити тағйирёбии иқлим ва афзоиши ниёз ба манбаъҳои устувори энергия аҳамияти хос пайдо мекунад. Иқтидори сармоягузорӣ ва таҷрибаи Чин дар якҷоягӣ бо захираҳои табиӣ ва афзалиятҳои стратегии Тоҷикистон метавонанд заминаи татбиқи ташаббусҳои нави бузургҳаҷмро фароҳам оранд.

Дар натиҷаи мулоқот ҷонибҳо омодагии худро ба густариши минбаъдаи шарикӣ ва татбиқи лоиҳаҳои судманд, ки ба рушди иҷтимоию иқтисодии Тоҷикистон ва таҳкими амнияти энергетикӣ ва обии минтақа мусоидат мекунанд, тасдиқ намуданд.

Акс: Вазорати энергетика ва захираҳои оби Ҷумҳурии Тоҷикистон