Қасым-Жомарт Тоқаев Сыртқы істер министрі Гидеон Саардың сапары Израильдің Қазақстанмен жан-жақты ынтымақтастықты нығайтуға деген берік міндеттемесін растайтынын атап өтті. Сауда-экономикалық, ғылыми және техникалық ынтымақтастықты нығайтуға, жасанды интеллект, ауыл шаруашылығы және су ресурстарын басқару салаларында бірлескен жобаларды жүзеге асыруға ерекше назар аударылды.

Президент Гидеон Саардың Астанаға сапары кезінде Қазақстан-Израиль бизнес-форумының өткізілуін құптады, оның нәтижелері екі елдің инвестициялық серіктестігін кеңейтуге нақты үлес қосуға бағытталған.

Өз кезегінде Сыртқы істер министрі Израильдің Қазақстанмен мемлекетаралық қарым-қатынастарды дамытуға елеулі серпін беруге, оларды сапалық тұрғыдан жаңа деңгейге көтеруге мүдделі екенін атап өтті. Гидеон Саар Президент Қасым-Жомарт Тоқаевтың тұрақтылықты, бейбітшілікті және халықаралық диалогты одан әрі нығайтуға ықпал ететін Авраам келісімдеріне қосылу туралы көреген шешімін ризашылықпен атап өтті.

Израиль сыртқы істер министрі сондай-ақ Қазақстанда жүзеге асырылып жатқан ауқымды саяси және әлеуметтік-экономикалық реформаларды жоғары бағалап, олардың сәтті жүзеге асырылатынына сенім білдірді. Әңгіме барысында халықаралық күн тәртібіндегі өзекті мәселелер бойынша пікір алмасылды.

Дереккөз: ХАБАР Ақпарат агенттігі