АСТАНА, 2026-жылдын 28-январы – Karavan Info маалымат агенттиги. Королевское кенинде мунай өндүрүү толугу менен калыбына келтирилди, ал эми Теңиз кени этап-этабы менен ишке киргизиле баштады. Бул тууралуу Казакстандын энергетика министри Ерлан Аккенженов билдирди. Ал Теңиз келерки жуманын ичинде толук кандуу ишке кириши күтүлүп жатканын кошумчалады.

Министр калыбына келтирүү иштери татаал технологиялык процесстин алкагында жүргүзүлүп жатканын белгиледи. Кенде болжол менен 30 трансформатор, негизинен 110 кВ иштейт. Кырсык үч негизги трансформаторду иштен чыгарган, бирок жабдуулардын айрымдары калыбына келтирилип, этап-этабы менен кайра ишке киргизүүгө мүмкүнчүлүк түзүлгөн. Теңизде алгачкы газ алынган.

Эске сала кетсек, 2026-жылдын январь айында кенде өрт чыгып, 450дөн ашык жумушчу эвакуацияланып, мунай өндүрүү токтотулган. Окуяны иликтөө үчүн өкмөттүк комиссия түзүлгөн. Премьер-министр Олжас Бектенов ExxonMobil менен сүйлөшүүлөрдү жүргүзүп, кырсыктын кесепеттерин тез арада жоюу жана өнөр жай коопсуздугун камсыз кылуу чараларын күчөтүү зарылдыгын баса белгилеген.

Сүрөт: Казакстан Республикасынын Энергетика министрлиги