ҚР Үкіметінде өткен жиында Астанада азаматтарды жұмыспен қамтуға жәрдемдесуге бағытталған «Joltap» жобасы қаралды. Бұл жоба тұрғындарға қалада тұрақты жұмыс табуға көмектеседі. Елордада қазірдің өзінде 11 кеңес беру пункті жұмыс істейді, онда азаматтарға мемлекеттік қолдау шаралары туралы айтылып, жұмысшы мамандықтары бойынша тегін курстардан өту ұсынылады.

Жоба оқытуды ғана емес, жұмысқа орналасу алдында жан-жақты қолдауды да қарастырады. Жобаның Jumys tap деп аталатын телеграмма боты да бар, оған қазірдің өзінде 8 мың адам жазылған.

«Жоба басталғалы 9 мыңнан астам адамға кеңес берілді. Мемлекеттік қолдау шараларына 3,5 мың азамат жүгінді. 2 мыңнан астам адам қысқа мерзімді курстарды бітірді. 1,5 мың азамат жұмысқа орналасты. Олардың кейбірі Қызмет көрсету, сауда, тігін, тағы басқалары қоғамдық тамақтандыру орындарында жұмыс тапты, олардың жартысынан астамы жастар», — деді Астана әкімінің орынбасары Евгений Глотов.

Қазақстан Республикасы Премьер-Министрінің орынбасары Тамара Дүйсенова бұл тәжірибені Қазақстанның басқа қалаларында тарату қажеттігін айтты.

«Қазір ірі қалалардағы кейбір жастар уақытша жұмыста ақша табуға мәжбүр. Сондай-ақ қайда барарын білмей жүргендер де бар. Сондықтан Астанада жүзеге асырылып жатқан тәжірибені басқа өңірлерде де кеңейту қажет. Қысқа мерзімді оқыту үшін жергілікті еңбек нарығының сұранысын ескеру қажет. Жастарға ерекше көңіл бөлу керек», — деді Премьер-Министрдің орынбасары.