Душанбе, 30 январ, – АИ «Корвон Иттилоот». Дар шаҳри Душанбе нишасти матбуотии Агентии авиатсияи граждании назди Ҳукумати Ҷумҳурии Тоҷикистон баргузор гардид, ки дар он директори агентӣ Хабибулло Назарзода натиҷаҳои фаъолияти соҳаи авиатсияро дар соли 2025 ҷамъбаст намуда, афзалиятҳои асосии соли 2026-ро муаррифӣ кард.
Маърӯза нишон дод, ки соҳа дар шароити мураккаб фаъолият бурда, ҳамзамон бо коҳиши баъзе нишондиҳандаҳо, имкониятҳои нави рушд ва васеъшавиро низ нигоҳ доштааст.
Тибқи иттилои Хабибулло Назарзода, соли 2025 Фурудгоҳи байналмилалии Душанбе ба беш аз 2 миллиону 160 ҳазор мусофир хизмат расонидааст.
Аз ин шумора 1 060 746 нафар воридшуда ва 1 099 502 нафар хориҷшуда мебошанд.
Дар маҷмӯъ, теъдоди мусофирон дар фурудгоҳҳои байналмилалии кишвар 2,9 миллион нафар-ро ташкил дода, нисбат ба соли 2024 399 ҳазор нафар кам шудааст, ки тақрибан 12 фоиз коҳишро нишон медиҳад.
Ҳамчунин шумораи хатсайрҳо низ коҳиш ёфта, дар соли 2025 ҳамагӣ 11,5 ҳазор парвоз анҷом дода шудааст, ки 170 парвоз камтар аз соли гузашта мебошад.
Соли 2025 ҳаҷми умумии бор ва почтаи тавассути терминали боркаши Фурудгоҳи байналмилалии Душанбе интиқолёфта 2 394 тонна-ро ташкил дод.
Аз ин шумора 346 тонна ба содирот ва 2 048 тонна ба воридот рост меояд.
Нисбат ба соли 2024 ҳаҷми боркашонӣ 233 тонна кам шудааст.
Бо вуҷуди коҳиш ёфтани баъзе нишондиҳандаҳо, фаъолияти амалиётии фурудгоҳ фаъол боқӣ мондааст. Дар соли 2025 зиёда аз 8 800 парвоз анҷом дода шуд, ки нисбат ба соли гузашта 7,3 фоиз бештар мебошад.
Парвозҳо аз ҷониби 18 ширкати ҳавопаймоӣ, аз ҷумла ширкатҳои хориҷӣ, кишварҳои ИДМ ва ду ширкати миллӣ — «Сомон Эйр» ва «Тоҷик Эйр» амалӣ гардидаанд.
Ҳамзамон 2 197 ҳолати таъхири парвоз ба қайд гирифта шудааст, ки сабабҳои асосии он дер омадани ҳавопаймо, номусоидии обу ҳаво ва омилҳои техникӣ мебошанд.
Дар соли ҳисоботӣ 150 муроҷиат вобаста ба осеб дидан ё гум шудани бағоҷ сабт гардида, 146 муроҷиат қонеъ карда шудааст. Теъдоди муроҷиатҳо нисбат ба соли гузашта 17 фоиз кам шудааст.
КВД «Тоҷикаэронавигация» соли 2025 ба 48 102 киштии ҳавоӣ хизмат расонидааст, аз ҷумла ба 24 466 парвози транзитӣ.
Баргузории ҷаласаи минтақавии ICAO RDGE-SSM/2025 дар Душанбе мавқеи Тоҷикистонро дар арсаи байналмилалии аэронавигатсия таҳким бахшид. Илова бар ин, татбиқи пурраи лоиҳаи PBN дар як қатор фурудгоҳҳо анҷом ёфт.
Дар нишасти матбуотӣ иттилоъ дода шуд, ки нархи чиптаҳои ҳавопаймоӣ 25–30 фоиз коҳиш ёфтааст. Ин тадбир дар натиҷаи тахфифи 40-фоизаи хизматрасонии фурудгоҳҳо ва сиёсати «осмони боз» амалӣ гардидааст.
Дар соли 2026 дар Тоҷикистон фаъолияти ширкати нави хусусии «Шоҳин Эйрлайнз» оғоз мегардад. Дар айни ҳол ширкат дорои якчанд чархбол буда, моҳи август парки он бо ҳавопаймои L-410 мукаммал мегардад. Ҳамчунин гуфтушунид бо ширкатҳои Airbus ва Boeing ҷараён дорад.
Ба гуфтаи масъулон, ин иқдом ба рушди рақобатпазирӣ ва навсозии бозори авиатсияи кишвар мусоидат хоҳад кард.
Ҳамин тариқ, натиҷаҳои соли 2025 нишон доданд, ки авиатсияи граждании Тоҷикистон дар шароити нооромии беруна ва тағйирёбии вазъи бозори ҷаҳонӣ фаъолият мебарад. Бо вуҷуди коҳиши ҷараёни мусофирон ва ҳаҷми боркашонӣ, соҳа устувории худро нигоҳ дошта, ҳузури байналмилалиро васеъ менамояд, инфрасохтори аэронавигатсиониро такмил медиҳад ва муҳити рақобатпазирро ташаккул медиҳад. Оғози фаъолияти ширкати нави ҳавопаймоӣ, поинравии нархи чиптаҳо ва мутобиқ намудани хизматрасониҳо ба меъёрҳои байналмилалӣ имкон медиҳанд, ки соли 2026 ҳамчун марҳилаи устуворшавӣ ва рушди тадриҷӣ бо тамаркуз ба дастрасии бештари парвозҳо ва таҳкими иқтидори транзитии кишвар арзёбӣ гардад.
АКС: АМИТ «ХОВАР»