Душанбе, 30 январ, – АИ «Корвон Иттилоот». Дар пойтахти Тоҷикистон марҳилаи нави гузариш ба истифодаи неруи офтоб оғоз ёфтааст. Дар шаҳри Душанбе насби панелҳои офтобӣ роҳандозӣ шуда, онҳо на танҳо дар биноҳо, балки дар баъзе иншооти нақлиётӣ ва ҳатто дар қитъаҳои роҳ низ ҷойгир карда мешаванд. Ин иқдом таваҷҷуҳи ҷомеаро ба худ ҷалб намуда, саволҳои зиёдеро ба миён овард.
Яке аз чунин панелҳои офтобӣ дар пули роҳи оҳан дар минтақаи «Комбинати нассоҷӣ»-и пойтахт насб гардидааст. Тавре «Азия-Плюс» муайян намуд, ин корҳо бахше аз ташаббуси фарогири давлатӣ буда, ҳадафи он сарфаи неруи барқ ва густариши истифодаи манбаъҳои алтернативии энергия мебошад.
29 январ зимни нишасти матбуотӣ дар Кумитаи меъморӣ ва сохтмони Ҷумҳурии Тоҷикистон намояндагони соҳа шарҳ доданд, ки панелҳои офтобӣ бо мақсади коҳиш додани сарборӣ ба шабакаҳои мутамаркази барқ ва истифодаи минбаъдаи онҳо дар корхонаҳои хурди саноатӣ, муассисаҳои кӯдакона ва хонаҳои истиқоматӣ насб карда мешаванд.
Раиси Кумита Низом Мирзозода таъкид намуд, ки бо фармони роҳбарияти Кумита аз 1 апрели соли 2024 насби панелҳои офтобӣ ҳатмӣ гардида, ҳамзамон гузаронидани экспертизаи давлатии иншооти марбут ба он тасдиқ шудааст.
Ба гуфтаи ӯ, аз замони ба имзо расидани ин санад то имрӯз 1 530 лоиҳа аз экспертиза гузаштааст ва ҳамаи онҳо насби ҳатмии панелҳои офтобиро бо иқтидори аз 250 то 500 ватт дар бар мегиранд.
Тавре шарҳ дода шуд, панелҳо асосан дар соатҳои рӯзона фаъолият намуда, объектҳоро бо неруи барқ таъмин мекунанд. Ин имкон медиҳад, ки сарфи барқ кам карда шавад ва дар ҳолати муваққатан қатъ гардидани шабакаи асосӣ таъминоти эҳтиётӣ таъмин гардад.
Ҳамчунин, пешбинӣ шудааст, ки лифтҳо ва камераҳои назоратӣ дар биноҳои истиқоматӣ бо неруи офтоб фаъол гарданд. Ин иқдом, ба гуфтаи масъулон, ба шабакаҳои мутамаркази барқ кӯмаки ҷиддӣ мерасонад.
Маълумоти расмӣ нишон медиҳад, ки тибқи иттилои Раёсати экспертизаи давлатии берун аз идораи ҳуҷҷатҳои лоиҳакашии шаҳрсозӣ, аз 1 апрели соли 2024 насби панелҳои офтобӣ дар 558 иншоот пешбинӣ шудааст.
Аз ҷумла, дар 381 бинои истиқоматӣ, 23 корхонаи саноатӣ, 61 муассисаи таҳсилоти умумӣ, 13 муассисаи томактабӣ, 42 беморхона ва маркази тиббӣ, инчунин дар 38 бинои маъмурӣ.
Ин тадбирҳо дар доираи сиёсати умумии давлат оид ба рушди бахши энергетика амалӣ мешаванд. Ёдовар мешавем, ки моҳи ноябри соли гузашта таҳти раёсати Президенти Ҷумҳурии Тоҷикистон муҳтарам Эмомалӣ Раҳмон ҷаласаи Ҳукумати кишвар баргузор гардид. Дар он вазири энергетика ва захираҳои об Далер Ҷумъа параметрҳои асосии «Барномаи рушди соҳаи электроэнергетика барои солҳои 2026–2030»-ро муаррифӣ намуд.
Тибқи ин барнома, ба истифода додани 2 680 МВт иқтидорҳои нав тавассути сохтмони неругоҳҳои барқи обӣ, афзоиши 253 МВт иқтидор бо роҳи таҷдиди неругоҳҳои амалкунанда, барқарорсозии 440 МВт тавассути навсозии таҷҳизот ва инчунин ба даст овардани 1 500 МВт неруи барқ аз ҳисоби энергияи офтобӣ дар назар аст.
Зимни ҷаласа Президенти кишвар дастур доданд, ки насби панелҳои офтобӣ дар биноҳои истиқоматӣ суръат бахшида шуда, онҳо ба шабакаи ягонаи энергетикии миллӣ муттаҳид гарданд. Ин иқдом самти стратегии Тоҷикистонро дар роҳи рушди «энергияи сабз» ва таҳкими устувории энергетикӣ бозгӯ мекунад.
Акси тасвирӣ
Акс: аз zoomit.ir