Душанбе, 30 январ, – АИ «Корвон Иттилоот». Дар нишасти матбуотӣ 28 январ Вазири нақлиёт Азим Иброҳим гуфт, ки аз ин миён панҷ лоиҳа ба маблағи 570,9 миллион доллар дар ҷараёни татбиқ қарор доранд ва шаш лоиҳаи дигар ба маблағи 602,2 миллион доллар аллакай ба анҷом расида, дар давраи кафолатӣ қарор доранд.

Вазир таъкид намуд, ки соли 2025 сохтмонҳои роҳҳои муҳим, аз ҷумла роҳи мошингарди Данғара–Гулистон (49 км), Гулистон–Фархор (29,6 км) ва таҷдиди роҳи Обигарм–Нуробод, қисми 3, инчунин сохтмони пули калон бо масофаи 920 метр ва се пул дар ноҳияи Восеъ ва Рӯдакӣ оғоз гардиданд.

Масъулияти нақлиёт дар Тоҷикистон дар шароити мамлакати кӯҳистон хеле баланд аст: 95,1% борҳо ва 99,8% мусофирон тавассути нақлиёти автомобилӣ интиқол дода мешаванд. Вазири нақлиёт хабар дод, ки соли 2025 нақлиёти автомобилӣ 147,3 миллион тонна бор ва 1129,5 миллион мусофирро интиқол дода, ки мутаносибан 115,4% ва 110,8% зиёд мебошад.

Ҳамзамон Азим Иброҳим афзуд, ки содироти бор тавассути нақлиёти автомобилӣ ба 1 208,9 ҳазор тонна, аз ҷумла маҳсулоти кишоварзӣ ба 232 105 тонна, ва воридот ба 2 046,7 ҳазор тонна расидааст. Корхонаҳои нақлиёти автомобилии Вазорат низ беш аз 1 миллиард мусофир ва 43,6 миллион тонна бор кашониданд. Гардиши мусофирбарӣ ба 9,8 миллиард мусофир, гардиши бор ба 9,1 миллиард тонна километр баробар аст, ки нисбат ба соли 2024 мутаносибан 111%, 109,6%, 111,3% ва 117,6% зиёд мебошад.

Дар қисмати дигар, Вазир хабар дод, ки сохтмони роҳи Дарваз – марз бо ноҳияи Рушан (ГБАО), ки баъди ҳамлаҳои мусаллаҳона аз қаламрави Афғонистон қатъ шуда буд, боз ҳам идома дорад. “Кори асосӣ ба анҷом расидааст, вале барои бетоникунӣ ва пайваст кардани барқ ба кӯмаки мутахассисони чинӣ ниёз дорем.

Корҳои физикӣ пурра аз ҷониби кормандони маҳаллӣ иҷро мешаванд,” — афзуд Азим Иброҳим. Ҳоло ба сохтмон тақрибан 100 нафар сокини маҳаллӣ низ ҷалб шудаанд. Ин роҳ қисми шоҳроҳи байналмилалии Душанбе–Қулма мебошад.

Бо мақсади густариши содироти молу маҳсулот ва дастгирии соҳибкорон, Корхонаи воҳиди давлатии “Роҳи оҳани Тоҷикистон” ба соҳибкорон то 80% сабукиҳо пешниҳод намудааст. Ҳамчунин, ин корхона ҳамкориро бо роҳҳои оҳани кишварҳои хориҷӣ, аз ҷумла Ӯзбекистон, Туркманистон, Қазоқистон ва Русия тақвият дода, сабукиҳои назаррасро барои боркашонӣ ба даст овардааст.

АКС: Вазорати нақлиёти Тоҷикистон