Кыргыз Республикасынын суу ресурстары, айыл чарба жана кайра иштетүү өнөр жай министринин орун басары Бектен Бекболотов менен Кытайдын айыл чарба техникасын өндүрүүчүлөр ассоциациясынын аткаруучу төрагасы Лю Хуанли жетектеген делегациянын жолугушуусунда айыл чарба техникасы жаатында кызматташууну өнүктүрүү мүмкүнчүлүктөрү талкууланды.
Кытай Ассоциациясы айыл чарба техникасы жана айыл чарбасын механикалаштыруу жаатында иштеген ишканаларды, илимий жана билим берүү мекемелерин, изилдөө борборлорун жана башка уюмдарды бириктирет.
Тараптар Кыргызстандын жыл сайын өтүүчү эл аралык айыл чарба техникасы көргөзмөсүнө катышуусун, республикада ушул сыяктуу иш-чараларды өткөрүү мүмкүнчүлүгүн жана Кытайдын Борбордук Азия өлкөлөрү үчүн айыл чарба техникасы көргөзмөлөрүнүн аймактык борборун түзүү сунушун талкуулашты.
Кытай тарап ачык кызыгуусун билдирген Кыргызстандагы айыл чарба техникаларын чогултуучу заводду куруу келечегине өзгөчө көңүл бурулду.
2026-жылдын 31-январы, саат 6:52:27