Қырғызстан кем дегенде 100 елден спортшылар мен қонақтарды жинайтын жоғары деңгейлі халықаралық шара — Дүниежүзілік көшпенділер ойындарын өткізеді.
Бұл туралы Қырғызстан Республикасы Министрлер Кабинетінің төрағасының орынбасары, су ресурстары, ауыл шаруашылығы және өңдеу өнеркәсібі министрі Бақыт Торобаев Ыстықкөл облысының Чолпан-Ата қаласындағы ипподромда өткен 2026 жылғы ойындарға дайындық бойынша көшпелі кеңесте мәлімдеді.
Кеңесте ауқымды мәдени және спорттық іс-шараға дайындық, ұйымдастыру жұмыстарының барысы, инфрақұрылым нысандарының жағдайы және халықаралық қонақтарды қабылдау шарттары талқыланды.
Мәдени жарыстардың жүлде қоры шамамен 4 миллион сомды құрайды деп хабарланды. Бағдарламада барлық негізгі ұлттық спорт түрлері мен ат спорты ойындары көрсетіледі. Ойындардың мақсаты қырғыз халқының көшпелі мәдениетін, дәстүрлерін және тарихи мұрасын халықаралық қауымдастыққа кеңінен таныстыру.
Жұмыс сапары барысында Бақыт Торобаев Чолпан-Атадағы ипподромның қазіргі жағдайын тексеріп, дайындықты күшейту, инфрақұрылымды жақсарту және халықаралық стандарттарға сәйкес жағдайлар жасау бойынша нақты тапсырмалар берді. Мемлекеттік және жергілікті билік органдарына белгіленген мерзімде жоғары сапалы дайындықты қамтамасыз ету тапсырылды.
Естеріңізге сала кетейік, 2026 жылғы Дүниежүзілік көшпенділер ойындары Қырғызстанда 31 тамыз бен 6 қыркүйек аралығында өтеді. Іс-шараның мақсаты — елдің туристік әлеуетін арттыру, ұлттық мәдениетті насихаттау және халықаралық ынтымақтастықты кеңейту.
07.02.2026 08:05:20