Душанбе, 09 феврал, – АИ «Корвон Иттилоот». Соли 2025 дар Тоҷикистон дар маҷмӯъ дар масоҳати 3276,3 гектар ҷангалҳо бунёд ва барқарор карда шуданд. Ин нишондиҳанда яке аз натиҷаҳои муҳими татбиқи сиёсати давлатии ҳифзи муҳити зист ва сабзгардонӣ ба шумор меравад. Дар ин бора директори Агентии хоҷагии ҷангали назди Ҳукумати Ҷумҳурии Тоҷикистон Абдуҷаббор Юсуфзода дар нишасти матбуотӣ дар Душанбе хабар дод.

Ба гуфтаи ӯ, қисми асосии корҳо ба барқарорсозии минтақаҳои осебдида рост меояд: 1862,9 гектар ҷангалҳо барқарор карда шуданд. Ҳамзамон, дар кишвар 316 гектар ҷангалҳои нав, аз ҷумла бо дарахтони дуб, писта, инчунин дигар навъҳои дарахтон ва чормағз бунёд гардиданд.

Дар баробари ин, тадбирҳо барои таҳкими ҷангалҳои мавҷуда низ амалӣ шуданд. Аз ҷумла, корҳои зичгардонии ниҳолҳо дар масоҳати 1024,5 гектар анҷом дода шуда, ҷангалшинонӣ дар 13 182 гектар гузаронида шуд. Тавре роҳбари Агентӣ таъкид кард, фаъолият дар ин самт идома дорад.

Нақши муҳим дар татбиқи барномаҳои ҷангалбарқароркунӣ ба ниҳолхонаҳо тааллуқ дорад. Муассисаҳои давлатии хоҷагии ҷангал ва корхонаҳои воҳиди давлатии ниҳолхонаҳои Агентӣ дар ин давра зиёда аз 43,4 тонна тухмӣ — аз дарахтони ҳамешасабз, мевадиҳанда, сояафкан, ороишӣ ва ҷангалзо ҷамъоварӣ намуданд. Ин захира барои густариши минбаъдаи сабзкориҳо дар саросари кишвар истифода хоҳад шуд.

Тадбирҳои мазкур дар доираи стратегияи дарозмуддат амалӣ мегарданд. Қаблан Ҳукумати Ҷумҳурии Тоҷикистон «Барномаи давлатии сабзгардонӣ барои давраи то соли 2040»-ро қабул карда буд. Тибқи ин барнома, дар кишвар шинондан ва парвариши зиёда аз ду миллиард ниҳол — аз дарахтони ҳамешасабз, ороишӣ, сояафкан ва мевадиҳанда, ки ба иқлими Тоҷикистон мутобиқанд, ба нақша гирифта шудааст.

Коршиносон бар ин назаранд, ки татбиқи ин барнома на танҳо вазъи экологиро беҳтар месозад, балки ба муқовимат бо тағйирёбии иқлим, коҳиши эрозияи хок ва нигоҳдории тавозуни табиии кишвар мусоидат хоҳад кард.

АКС: НИАТ «Ховар»