Душанбе, 09 феврал, – АИ «Корвон Иттилоот». Дар Осорхонаи миллии Тоҷикистон дар шаҳри Душанбе намоиши асарҳои рассомони ҷавон таҳти унвони «Ҷавонон — зидди терроризм» оғоз гардид. Ин чорабинӣ на танҳо рӯйдоди фарҳангӣ, балки минбари муҳими иҷтимоӣ барои баррасии яке аз хатарҳои ҷиддии замони муосир — терроризм ва экстремизм — ба шумор меравад.

Тавре аз Осорхонаи миллии Тоҷикистон хабар доданд, намоиш бо ташаббуси Прокуратураи генералии Ҷумҳурии Тоҷикистон ва Вазорати фарҳанги Ҷумҳурии Тоҷикистон ташкил шудааст. Дар маркази таваҷҷуҳ нақши ҷавонон дар муқовимат бо андешаҳои ифротӣ ва таҳкими суботи ҷомеа қарор дорад.

Зимни маросими ифтитоҳ таъкид гардид, ки терроризм ва экстремизм имрӯз ба хатари ҷиддии ҷаҳонӣ табдил ёфта, ба амнияти давлатҳо, сулҳу суботи ҷомеа ва ҳаёти осоиштаи мардум таҳдид менамоянд. Иштирокдорон зикр карданд, ки пешгирии гаравидани ҷавонон ба гурӯҳҳои ифротгаро, боло бурдани маърифати ҳуқуқӣ, сиёсӣ ва фарҳангии онҳо, инчунин таҳкими эҳсоси ватандӯстӣ аз самтҳои муҳими сиёсати давлатӣ маҳсуб меёбад.

Ҳамзамон, ба нақши ҷавонон дар ҳифзи сулҳ, субот ва истиқлолияти давлатӣ таваҷҷуҳи хос зоҳир гардид. Қайд карда шуд, ки Ҳукумати Ҷумҳурии Тоҷикистон дар даврони Истиқлолияти давлатӣ заминаҳои устувори ҳуқуқӣ ва ташкилию ниҳодиро барои муқовимат бо терроризм ва экстремизм фароҳам оварда, як қатор қонунҳо ва стратегияҳои муҳимеро қабул ва татбиқ намудааст.

Иштирокдорон бо асарҳои рассомони ҷавон шинос шуданд, ки онҳо бо забони санъат хатари терроризм ва экстремизм, пайомадҳои фоҷиабори он, инчунин аҳамияти сулҳ, ваҳдати миллӣ ва ҳамдигарфаҳмиро инъикос мекунанд. Дар ин намоиш санъат ҳамчун василаи баёни мавқеи шаҳрвандӣ ва масъулияти иҷтимоӣ баромад мекунад.

Дар анҷоми чорабинӣ муаллифони асарҳои беҳтарин — мусаввирони ҷавон — барои саҳми арзанда дар тарғиби ғояҳои сулҳ, ватандӯстӣ ва худогоҳии миллӣ бо туҳфаҳо ва ифтихорномаҳо қадрдонӣ гардиданд.

Намоиш то 14 феврал дар Осорхонаи миллии Тоҷикистон идома меёбад.

Акс: Осорхонаи миллии Тоҷикистон