Душанбе, 10 феврал, – АИ «Корвон Иттилоот». Тоҷикистон дар самти инноватсия ва технологияҳои рақамӣ тадриҷан мавқеи худро тақвият бахшида, на танҳо ба ислоҳоти дохилӣ, балки ба густариши ҳамкориҳои байналмилалӣ низ такя мекунад. Дар соли 2025 Агентии инноватсия ва технологияҳои рақамӣ назди Президенти Ҷумҳурии Тоҷикистон 13 санади ҳамкориро бо давлатҳои хориҷӣ ба имзо расонд, ки яке аз нишондиҳандаҳои муҳими рушди стратегӣ ва боз будани соҳа ба таҷрибаи ҷаҳонӣ маҳсуб меёбад.

Дар ин бора директори Агентӣ Хуршед Файзуллозода зимни нишасти матбуотӣ дар Душанбе хабар дод. Ба гуфтаи ӯ, санадҳои ҳамкорӣ бо Чин, Русия, Қазоқистон, Эрон, Муғулистон, Ӯзбекистон, Иёлоти Муттаҳидаи Амрико ва Ҷопон ба имзо расидаанд. Ҷуғрофияи васеи ҳамкориҳо имконият медиҳад, ки Тоҷикистон аз манбаъҳои гуногуни дониш, технология ва таҷрибаи идоракунӣ истифода барад.

Ин санадҳо ба ҷорӣ намудани роҳҳалҳои пешрафтаи рақамӣ, табодули таҷриба ва тайёр кардани мутахассисони замонавӣ равона шудаанд. Масъалаи кадрҳо, ба гуфтаи роҳбарияти Агентӣ, яке аз мушкилоти асосии рақамисозии соҳа боқӣ мемонад. Дар ҳамин замина, бо қарори дахлдори Ҳукумати Ҷумҳурии Тоҷикистон Муассисаи давлатии таълимии «Донишгоҳи инноватсия ва технологияҳои рақамии Тоҷикистон» таъсис дода шуд.

Ин донишгоҳ ҳамчун маркази омодасозии мутахассисони IT, муҳандисон ва таҳлилгарон, инчунин майдони таҳқиқоти илмӣ ва коркардҳои амалӣ фаъолият хоҳад кард. Дар марҳилаи аввал дар назди донишгоҳ корҳои таъсиси литсейҳои равияи математикию техникӣ оғоз гардидаанд, ки ин аз муносибати дарозмуддат ба ташаккули захираҳои инсонӣ шаҳодат медиҳад.

Ҳамзамон бо тадбирҳои таълимӣ ва институтсионалӣ, дар кишвар пояи меъёриву ҳуқуқии соҳаи рақамӣ низ тақвият меёбад. Аз оғози фаъолияти Агентӣ то имрӯз панҷ қонун, сӣ қарори Ҳукумат ва чаҳор фармони Президенти Ҷумҳурии Тоҷикистон қабул ва мавриди амал қарор дода шудаанд. Ин санадҳо заминаи ҳуқуқиро барои рушди хизматрасониҳои электронӣ, ҳифзи маълумот ва идоракунии рақамӣ фароҳам месозанд.

Ба татбиқи амалии рӯзномаи рақамӣ низ таваҷҷуҳи махсус зоҳир мегардад. Бо мақсади гузариши пурра ба низоми рақамӣ, харитасозии самараноки равандҳо ва ҳамоҳангсозии фаъолияти мақомоти давлатӣ, Агентӣ бо 50 вазорату идораи дахлдор нақшаҳои муштараки амалро ба имзо расонд. Ин равиш имкон медиҳад, ки лоиҳаҳои рақамӣ ҳамоҳанг карда шуда, такроршавии вазифаҳо коҳиш ёбад ва ҷорӣ намудани хизматрасониҳои электронӣ суръат гирад.

Коршиносон бар он назаранд, ки омезиши ҳамкориҳои байналмилалӣ, тайёр кардани кадрҳои касбӣ ва такмили заминаи ҳуқуқӣ барои ташаккули экосистемаи пурраи рақамӣ дар Тоҷикистон заминаи устувор мегузорад. Дар шароити рақобати ҷаҳонии технологӣ маҳз чунин иқдомҳои мукаммал қобилияти кишварро барои истифодаи имкониятҳои иқтисоди рақамӣ ва таъмини рушди устувор муайян мекунанд.

АКС: Агентии инноватсия ва технологияҳои рақамӣ назди Президенти Ҷумҳурии Тоҷикистон