Душанбе, 10 феврал, – АИ «Корвон Иттилоот». Ҷавонони Тоҷикистон иштироки худро дар платформаҳои байналмилалии башардӯстона ва ҷамъиятӣ густариш дода, ҳамчун иштирокчиёни фаъоли муколамаи байнифарҳангӣ ва табодули таҷриба баромад менамоянд. 5 феврали соли 2026 ҳайати ҷавонони Ҷумҳурии Тоҷикистон иборат аз 10 нафар дар марафони байналмилалии ҷавонон таҳти унвони «Россия — семья семей», ки дар шаҳри Москваи Федератсияи Россия баргузор гардид, иштирок намуд.

Иштироки ҷавонони тоҷик дар ин чорабинии байналмилалӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба роҳ монда шуда, ҳадафи он таҳкими ҳамкориҳои байналмилалӣ, густариши робитаҳои гуманитарӣ ва муаррифии арзишҳои миллӣ ва мероси фарҳангии кишвар дар арсаи байналмилалӣ буд.

Ҳайати намояндагӣ гуногунҷабҳа ва фаъолнокии ҷавонони муосири тоҷикро инъикос намуд. Ба ҳайат роҳбарони бахшҳои кор бо ҷавонони муассисаҳои таҳсилоти олӣ, олимони ҷавон, блогерон ва намояндагони ҷавонони фаъол аз соҳаҳои гуногуни фаъолияти ҷамъиятӣ шомил буданд. Ин таркиб имкон дод, ки Тоҷикистон ҳамчун кишваре бо ҷомеаи ҷавони рушдёбанда ва ташаббускор муаррифӣ гардад.

Барномаи марафони байналмилалӣ фарогири чорабиниҳои гуногун буд. Дар доираи он лексияҳои маърифатӣ, мастер-классҳои фарҳангӣ ва варзишӣ, намоишҳои либоси миллӣ, консертҳо ва барномаҳои эҷодӣ баргузор гардиданд. Ҳайати Ҷумҳурии Тоҷикистон дар ин чорабиниҳо иштироки фаъол намуда, унсурҳои фарҳанги миллӣ, иқтидори эҷодӣ ва омодагии худро ба ҳамкории байнифарҳангӣ нишон дод.

Илова бар ин, барои иштирокчиён намоишгоҳҳои мавзӯӣ, китобхонаҳои адабиёти халқҳои кишварҳои гуногун, муаррифии таомҳои миллӣ ва барномаҳои интерактивӣ ташкил карда шуданд. Ин имконият фароҳам овард, ки ҷавонони тоҷик бо ҳамсолони худ аз давлатҳои дигар мустақиман муошират намуда, таҷриба мубодила кунанд ва анъанаҳои фарҳангии кишвари худро муаррифӣ намоянд.

Коршиносони соҳаи сиёсати ҷавонон бар он назаранд, ки иштирок дар чунин ташаббусҳои байналмилалӣ ба рушди малакаҳои муоширати байнифарҳангӣ, васеъ шудани ҷаҳонбинӣ ва ташаккули масъулияти намояндагии кишвар дар хориҷ мусоидат мекунад. Дар маҷмӯъ, чунин чорабиниҳо ба таҳкими дӯстӣ ва ҳамдигарфаҳмӣ миёни ҷавонони кишварҳои гуногун нақши муҳим мебозанд.

Иштироки ҳайати Ҷумҳурии Тоҷикистон дар марафони байналмилалии «Россия — семья семей» қадами навбатӣ дар самти таҳкими симои мусбати ҷавонони тоҷик дар арсаи байналмилалӣ буда, омодагии онҳоро барои иштирок дар муколамаи ҷаҳонии ҷавонон боз ҳам равшантар намуд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон