AFG'ONISTON, 2026-yil 11-fevral – Karavan Info axborot agentligi. Eronning Kobuldagi elchisi Alireza Bikdeli seshanba, 10-fevral kuni TOLOnews agentligiga bergan intervyusida Tolibon ma'muriyatini tan olishda hech qanday to'siqlar yo'qligini aytdi.

Uning qo'shimcha qilishicha, muzokaralar davom etmoqda va Tehron yaqin kelajakda Tolibon hokimiyatini rasman tan oladi.

Bikdeli munosabatlar darajasi, Tehron va Kobulda ikki mamlakat elchilarining mavjudligi, savdo almashinuvlari va hamkorlikni kengaytirish istagi allaqachon amalda tan olinganlikdan dalolat berishini ta'kidladi.

Seshanba kuni TOLOnews telekanalida efirga uzatilgan intervyuda u shunday dedi:

"Tan olish borasida, albatta, bizning o'z tashabbusimiz bo'ladi, buni barchangiz qadrlaysiz. Islom Respublikasi tan olish masalasidan munosabatlarni yuksaltirish uchun foydalanadi."

Elchi, shuningdek, Tolibon ma'muriyati bilan savdo-iqtisodiy aloqalarning kengayishiga ishora qilib, tomonlar "yaxshi sheriklarga aylanganini" qo'shimcha qildi.

Kobul va Tehron o'rtasidagi munosabatlar darajasi haqidagi savolga javob berar ekan, u Tehron " hech bir davlatga Afg'oniston kabi yaqin emasligini" ta'kidladi.

Intervyuning boshqa qismida Bikdeli Afg'onistonga xorijiy aralashuv ehtimoli borasida xavotir bildirdi, ammo qo'shimcha tafsilotlarni keltirmadi.

Eron rasmiylari ilgari Amerika kuchlarining Bagram aviabazasiga qaytishi va Afg'onistonda AQSh harbiy bazasining tashkil etilishi mumkinligidan xavotir bildirishgan edi.

Agar rasman tan olinsa, Eron Rossiyadan keyin Tolibon ma'muriyatini tan olgan ikkinchi davlatga aylanadi.

Surat: Areu