Душанбе, 13 феврал, – АИ «Корвон Иттилоот». 10 феврали соли 2026 ҳайати олимон ва муҳаққиқони тоҷик дар Сафорати Ҷумҳурии Тоҷикистон дар Давлати Кувайт пазироӣ гардиданд. Ин мулоқот дар заминаи иштироки намояндагони илми ватанӣ дар яке аз бузургтарин форумҳои ихтироъкорӣ дар минтақа баргузор шуд.

Аз 8 то 11 феврали соли ҷорӣ дар Давлати Кувайт “16-умин Намоишгоҳи байналмилалии ихтироъкорӣ дар Ховари Миёна” баргузор мегардад, ки дар он ҳашт нафар олимон, профессорон ва ихтироъкорони тоҷик аз донишгоҳҳо ва муассисаҳои таҳсилоти олии Ҷумҳурии Тоҷикистон иштирок доранд.

Намоишгоҳи байналмилалии ихтироъкорӣ дар Кувайт ҳамасола муҳаққиқон, навоварон ва таҳиягаронро аз кишварҳои гуногун муттаҳид намуда, барои муаррифии технологияҳои нав ва дастовардҳои илмӣ майдони мусоид фароҳам меорад.

Иштироки ҳайати Тоҷикистон дар ин чорабинӣ имконият медиҳад, ки иқтидори зеҳнӣ ва илмӣ-техникии кишвар муаррифӣ гардида, робитаҳои байналмилалӣ густариш ёбанд ва таваҷҷуҳ ба дастовардҳои олимони тоҷик ҷалб карда шавад.

Зимни мулоқот Сафири Ҷумҳурии Тоҷикистон ба ҳайати профессорон ва ихтироъкорон барору комёбӣ, дастовардҳои назаррас ва ноил шудан ба ҷоизаҳоро таманно намуд.

Пазироии ҳайат дар сафорат нишон медиҳад, ки пешбурди дастовардҳои илмӣ дар сатҳи байналмилалӣ ҷузъи муҳими сиёсати муаррифии иқтидори миллӣ мебошад. Ҳузури олимони тоҷик дар чунин намоишгоҳҳо ба таҳкими ҳамкориҳои илмӣ ва табодули таҷриба дар фазои ҷаҳонӣ мусоидат менамояд.

АКС: Сафорати Ҷумҳурии Тоҷикистон дар Давлати Кувайт