2026-жылдын 9-февралынан 12-февралына чейин Москвада өткөн 33-эл аралык азык-түлүк, суусундуктар жана аларды өндүрүү үчүн чийки зат "Продэкспо-2026" көргөзмөсүнө 20дан ашык кыргызстандык компания катышты.

"Кыргыз экспорту" мамлекеттик экспортту өнүктүрүү жана илгерилетүү борборунун колдоосу менен "Продэкспо-2026" аянтчасында улуттук көргөзмө өткөрүлүп, анда кыргыз компаниялары республиканын экспорттук потенциалын көрсөтүү мүмкүнчүлүгүнө ээ болушту.

Ата мекендик экспортту орус рыногуна жылдыруу үчүн, Кыргыз Республикасынын Россия Федерациясындагы элчилиги Кыргыз Республикасынын экспортко багытталган компаниялары менен алдыңкы орусиялык бизнес ассоциацияларынын өкүлдөрүнүн ортосунда B2B жолугушууларын уюштурду. Ошондой эле, алар кыргыз компаниялары менен ири федералдык жана аймактык чекене соода тармактарынын өкүлдөрүнүн ортосундагы сүйлөшүүлөрдү камтыган "Тармактык сатып алуу борбору" атайын программасына катышуусуна көмөктөштү.

Көргөзмөдөн кийин, "2026-жылдын мыкты продуктусу" номинациясындагы дегустациялык сынакта Кыргыз Республикасындагы бир катар экспортко багытталган компаниялардын жогорку потенциалы белгиленди.

Маалымат үчүн: Prodexpo – Орусиядагы жана Чыгыш Европадагы эң ири эл аралык тамак-аш жана суусундуктар көргөзмөсү, дүйнө жүзү боюнча эң популярдуу 10 көргөзмөнүн катарына кирет. Бул жылы 35 өлкөдөн 2000ден ашык компания катышты. Кыргыз Республикасын кошкондо 13 өлкөдөн улуттук экспонаттар көрсөтүлүүдө. Prodexpo 2026 көргөзмөсүндө дүйнө жүзү боюнча алдыңкы өндүрүүчүлөрдүн жана жеткирүүчүлөрдүн эң мыкты тамак-аш жана суусундук продукциялары көрсөтүлөт.

Булак: Кыргыз Республикасынын Россия Федерациясындагы элчилиги