ООГАНСТАН, 2026-жылдын 24-апрели – Karavan Info маалымат агенттиги. Пакистандын бийлиги Кыргызстандагы коммерциялык товарлардын биринчи партиясы өлкөгө жаңы маршрут аркылуу жеткирилгенин билдирди. Бул кадам Ооганстан менен чек арадагы уланып жаткан чыр-чатактарга жана соода жолдорунун үзгүлтүксүз жабылышына жооп катары жасалды.

Өкмөттүн маалыматы боюнча, жүк Пакистанга келгенге чейин Хунжераб ашуусу жана кургак порт аркылуу өткөн. Улуттук логистикалык компаниянын өкүлдөрү жаңы маршрут Борбор Азия өлкөлөрүнөн — Кыргызстан, Тажикстан, Түркмөнстан, Казакстан жана Өзбекстандан — Карачи портуна түз жетүүнү камсыз кылаарын билдиришти.

Пакистандын расмий өкүлдөрү бул жол Ооганстанды айланып өтүп, өлкөнүн аймактагы маанилүү транзиттик борбор катары ролун бекемдей турганын баса белгилешет. Бирок, соода боюнча эксперттер бул жолду узак жана кымбатыраак деп эсептешет.

Arab News маалымат агенттигинин маалыматы боюнча, бул жолдун өнүгүшү Ооганстан менен Пакистандын ортосундагы мамилелердин начарлашы, чек арадагы кагылышуулар жана салттуу соода жолдорун колдонууну чектеген коопсуздук маселелери менен байланыштуу.

Пакистан бийлиги жаңы жолду туруктуулук үчүн маанилүү деп атаганы менен, айрым жергиликтүү ишкерлер Кытай аркылуу өтүүчү жолдун узакка созулуп, транспорттук чыгымдарды көбөйтүп жатканына тынчсыздануусун билдиришүүдө.

Белгилей кетсек, өткөн жылы Ооганстан менен Пакистандын ортосундагы соода көлөмү 1 миллиард долларга жеткен, бирок учурда ал дээрлик нөлгө чейин төмөндөгөн жана эки тарап тең альтернативдүү соода жолдорун издеп жатышат.

Сүрөт: Wikipedia