ООГАНИСТАН, 2026-жылдын 24-апрели – Karavan Info маалымат агенттиги. Бириккен Улуттар Уюмунун Гуманитардык маселелерди координациялоо боюнча башкармалыгы (OCHA) Ооганстанга кайтып келген аялдар менен кыздар коомдун эң аялуу катмары бойдон кала берерин билдирди.

Уюмдун айтымында, аларга негизги муктаждыктарды жабуу үчүн гуманитардык жардамды көбөйтүү зарыл.

Отчетто кайтып келгендер билим алуу жана саламаттыкты сактоо кызматтарынан тартып, жумушка орношуу мүмкүнчүлүктөрүнө жана кадимки жашоого чейинки олуттуу чектөөлөргө туш болуп жатканы баса белгиленет.

Алардын көбү эч кандай жашоо каражаты жок кайтып келери белгиленүүдө.

БУУ буга чейин Ооганстанга депортацияланган аялдар менен кыздар өтө жакырчылыкка, эксплуатацияга жана мажбурлап никеге турууга дуушар болуу коркунучунда экенин эскерткен.

Жүз миңдеген мигранттар, негизинен Иран жана Пакистандан, өлкөгө кайтып келүүнү улантууда. БУУнун миссиясынын (UNAMA) маалыматы боюнча, алардын дээрлик үчтөн бири аялдар жана кыздар.

Сүрөт: Рейтер/Парвиз