ООГАНИСТАН, 2026-жылдын 1-майы – Karavan Info маалымат агенттиги. "Афганфильмдин" мурдагы жетекчиси Сахра Карими талибдер кыздардын билим алуу мүмкүнчүлүгүн чектеп гана тим болбостон, ооган аялдарынын үнүн, ой жүгүртүүсүн жана коомдук катышуусун басууга аракет кылып жатканын билдирди.

Анын айтымында, акыркы беш жылга жакын убакыттын ичинде өкмөттүн саясаты аялдардын укуктарына кеңири чектөөлөрдү алып келди. Карими кыздар мектептери жана университеттер жабылып, аялдарды коомдук жашоодон четтетүү аракеттери күчөгөнүн баса белгиледи.

«Алар мектептерди жана университеттерди жаап гана тим болбостон, аялдардын оозун жабууга, алардын катышуусун жана ой жүгүртүүсүн чектөөгө аракет кылып жатышат», – деп белгиледи ал.

Карими кысымга карабастан, ооган аялдары каршылык көрсөтүүнү улантып, киргизилген чектөөлөрдү кабыл албай жатканын кошумчалады.

Бул тууралуу билдирүү Ооганстандагы аялдарды колдоо боюнча эл аралык коалициянын жыйынында жасалды.

Сүрөт: С. Кариминин социалдык медиа аккаунтунан