Душанбе, 10 июн, – АИ «Корвон Иттилоот». Дар Донишгоҳи миллии Тоҷикистон мизи мудаввар таҳти унвони «Забони русӣ ҳамчун фазои фарҳанг ва муколамаи байналмилалӣ» баргузор гардид, ки ба Рӯзи забони русӣ бахшида шуда буд. Чорабинӣ намояндагони корпуси дипломатӣ, ҷомеаи илмӣ, омӯзгорон ва донишҷӯёнро гирд оварда, ба майдони муҳими баррасии нақши забони русӣ дар рушди ҳамкориҳои гуманитарии Тоҷикистону Русия табдил ёфт.

Дар ҳамоиш Сафири Федератсияи Русия дар Ҷумҳурии Тоҷикистон Семён Григорев, муовини ректор оид ба робитаҳои байналмилалии Донишгоҳи миллии Тоҷикистон И.П. Ғаффорзода, декани факултети филологияи рус Х.И. Икромзода, омӯзгорон ва донишҷӯёни донишгоҳ иштирок намуданд.

Сафири Русия зимни суханронии худ таъкид кард, ки фазои ягонаи забонӣ ва имкони муоширати мустақим миёни мардум ба таҳкими ҳамдигарфаҳмӣ, эътимод ва муносибатҳои дӯстонаи байни халқҳои Тоҷикистону Русия мусоидат менамояд. Ба гуфтаи ӯ, дастгирии забони русӣ ва рушди таҳсилоти русизабон дар Тоҷикистон яке аз самтҳои муҳими ҳамкориҳои гуманитарии ду кишвар боқӣ мемонад.

Дар ҷараёни мизи мудаввар масъалаҳои рушди таҳсилоти русизабон, омодасозии кадрҳои омӯзгорӣ ва ҳифзи мероси ғании адабӣ мавриди муҳокима қарор гирифтанд. Зикр гардид, ки факултети филологияи руси Донишгоҳи миллии Тоҷикистон солҳои зиёд ҳамчун маркази асосии омодасозии омӯзгорони забони русӣ ва адабиётшиносон фаъолият мекунад.

Имрӯз дар факултет зиёда аз 50 омӯзгор фаъолият дошта, аз ин шумора 30 нафар номзади илм ва 6 нафар доктори илм мебошанд. Ин нишондиҳанда аз иқтидори баланди илмӣ ва таълимии муассиса шаҳодат медиҳад.

Яке аз суханрониҳои хотирмон ба устоди собиқадори донишгоҳ Кумринисо Содиқова тааллуқ дошт, ки беш аз 70 соли фаъолияти меҳнатии худро ба таълиму тарбияи насли наврас ва омӯзиши забони русӣ бахшидааст. Роҳи пуршарафи фаъолияти омӯзгории ӯ намунаи садоқат ба касб ва идомаи анъанаҳои беҳтарини маориф арзёбӣ гардид.

Иштирокчиён таъкид намуданд, ки забони русӣ имрӯз низ дар рушди ҳамкориҳои илмӣ, таълимӣ ва фарҳангӣ дар фазои пасошӯравӣ нақши муҳим дошта, ҳамчун воситаи муҳими муоширати байналмилалӣ, табодули дониш ва рушди касбии ҷавонон хизмат мекунад.

Қисмати фарҳангии чорабинӣ бо барномаи консертии омоданамудаи донишҷӯён анҷом ёфт. Иштирокчиён бо эҳсоси баланди ҳунарӣ шеърҳои шоири бузурги рус Александр Пушкинро қироат намуда, инчунин барномаҳои мусиқӣ ва рақсии ҷолибро пешкаши ҳозирин карданд.

Ба андешаи иштирокчиён, баргузории чунин ҳамоишҳо ба таҳкими робитаҳои гуманитарӣ, густариши муколамаи фарҳангҳо ва рушди фазои бисёрзабонаи таълим мусоидат намуда, барои тақвияти дӯстӣ ва ҳамкории Тоҷикистону Русия заминаи устувор фароҳам меорад.

Акс: Сафорати Федератсияи Русия дар Ҷумҳурии Тоҷикистон