Бишкек, 2026-жылдын 8-июну – Karavan Info маалымат агенттиги. Кыргызстандын тургундары 31-августтан 6-сентябрга чейин Кыргызстанда өтө турган VI Дүйнөлүк көчмөндөр оюндарынын иш-чараларына улуттук же этникалык стилдеги кийимдерди кийүүгө чакырылат. Бул тууралуу оюндардын башкы директору Алтынбек Максүтов радиодон билдирди.

Анын айтымында, бул кыргыз элинин маданий мурасын баса белгилеп, эл аралык иш-чара учурунда өзгөчө маанай жаратат.

Максутов быйылкы маданий программа бир топ кеңейтилгенин белгиледи. Курманжан Датка атындагы көчмөн цивилизация музейинде эл аралык жана улуттук сынактар аркылуу тандалып алынган сүрөтчүлөрдүн жана скульпторлордун эмгектери көрсөтүлөт. Тактап айтканда, 45 сүрөтчү жана жети таш оюучу катышат.

Ошондой эле, ал оюндарга даярдык көрүүнүн алкагында маданий программанын катышуучулары үчүн сынактык тандоо аяктаганын билдирди – жалпысынан 8 эл аралык жана 2 улуттук сынак өткөрүлүп, алардын жыйынтыгы боюнча ар кандай искусство тармактарынын өкүлдөрү тандалып алынган.

Тандалган иш-чаралар "Рух Ордо" маданий комплексинде өткөрүлөт, анда көрүүчүлөргө салттуу көчмөн музыкасы жана спектаклдери тартууланат. Ипподромдо "Көчмөндөр жаңырыгы" программасы, ошондой эле оюндардын ачылыш жана жабылыш аземдери өтөт.

Мындан тышкары, Nomad Fest фестивалында этникалык мода, этникалык бий, кол өнөрчүлүк жана музыкалык искусство боюнча эл аралык сынактар өткөрүлөт, ага кыргызстандык жана эл аралык аткаруучулар катышат.

Ошондой эле уюштуруучулар Кырчын жайлоосунун аймагы 52 гектарга чейин кеңейтилгенин, ал жерде стилдештирилген байыркы шаарчалар курулуп, тематикалык аймактардын саны көбөйүп жатканын билдиришти.