Астана, 2026-жылдын 8-июну – Karavan Info маалымат агенттиги. Казакстандын саламаттыкты сактоо министри Акмарал Альназарова Астанадагы №1 жана №13 шаардык поликлиникаларды, ошондой эле жеке менчик шаардык поликлиниканы кыдырып, баштапкы медициналык-санитардык жардам системасындагы реформалардын жыйынтыктары менен таанышты.

Иш сапарынын алкагында министр дарыгерлер жана медициналык кызматкерлер менен жолугушуп, алдын алуучу медицинаны өнүктүрүү, санариптештирүү, кызмат көрсөтүүлөрдүн сапатын жакшыртуу жана 2027-жылдан баштап камсыздандырууга негизделген каржылоо моделине өтүүгө даярдык көрүү маселелерин талкуулады.

Балдар медицинасына жана педиатриялык кызмат көрсөтүүлөрдү өнүктүрүүгө өзгөчө көңүл бурулду. Саламаттыкты сактоо министринин айтымында, жаңы ыкмаларды ишке ашырууда эл аралык тажрыйба жана казакстандык балдардын муктаждыктары эске алынат.

Биринчи чейректе No1 поликлиникада 10 миңден ашык адам скринингден өтүп, дээрлик 200 бейтапта ар кандай оорулар алгачкы этапта аныкталган.

«Ар кандай өзгөрүүнүн ийгилигинин негизги көрсөткүчү – бул адамдардын ден соолугу, ооруларды өз убагында аныктоо, медициналык жардамдын жеткиликтүүлүгү жана көрсөтүлгөн кызматтардын сапатына бейтаптардын канааттануусу», – деп баса белгиледи Акмарал Алназарова.

Министр ошондой эле саламаттыкты сактоо кызматкерлерин кызмат көрсөтүүлөрдүн санына эмес, дарылоонун жана алдын алуунун сапатына багытталган эмгек акы системасы аркылуу мотивациялоонун маанилүүлүгүн белгиледи.

Сүрөт: Казакстан Республикасынын Саламаттыкты сактоо министрлиги