Душанбе, 13 июн, – АИ «Корвон Иттилоот». Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 12 июн ҷаласаи корӣ баргузор намуда, масъалаҳои омодагӣ ба таҷлили 35-солагии Истиқлоли давлатии Ҷумҳурии Тоҷикистон ва дигар масъалаҳои муҳими иҷтимоиву иқтисодиро мавриди баррасӣ қарор доданд.
Дар ҷаласа Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ, роҳбарони вазорату идораҳо ва дигар шахсони масъул иштирок намуданд.
Мавзӯи асосии ҷаласа иҷрои барномаҳои ободониву созандагӣ бахшида ба 35-солагии Истиқлоли давлатӣ буд. Сарвари давлат ба масъулон дастур доданд, ки корҳои сохтмонӣ ва омодасозии корхонаҳо, муассисаҳо ва дигар иншооти пешбинишуда дар доираи барномаҳои ҷашнӣ суръат бахшида шаванд.
Таъкид гардид, ки ҳамаи лоиҳаҳои банақшагирифташуда бояд дар муҳлатҳои муқарраргардида ва бо сифати баланд ба анҷом расонида шаванд. Зикр шуд, ки ҷашни 35-солагии Истиқлолият бояд на танҳо бо баргузории чорабиниҳои тантанавӣ, балки бо натиҷаҳои воқеии рушди иҷтимоиву иқтисодӣ, беҳтар гардидани инфрасохтор ва болоравии сатҳи зиндагии аҳолӣ истиқбол гирифта шавад.
Ҳамзамон дар ҷаласа масъалаҳои омодагӣ ба мавсими тирамоҳу зимистони солҳои 2026–2027 баррасӣ шуданд. Президенти мамлакат ба сохторҳои дахлдор супориш доданд, ки ба таъмиру навсозӣ ва таъмини муассисаҳои соҳаҳои маориф ва тандурустӣ таваҷҷуҳи бештар зоҳир намоянд.
Ба андешаи коршиносон, таваҷҷуҳи роҳбарияти давлат ба масъалаҳои омодагӣ ба фасли зимистон ҳанӯз дар фасли тобистон аз сиёсати дурбинона ва муносибати ҳамаҷониба ба таъмини фаъолияти устувори инфрасохтори иҷтимоӣ ва низоми энергетикӣ шаҳодат медиҳад. Ин масъала махсусан дар шароити афзоиши аҳолӣ, густариши шабакаи муассисаҳои иҷтимоӣ ва татбиқи барномаҳои бузурги рушди минтақаҳо аҳамияти бештар касб мекунад.
Ҷашни 35-солагии Истиқлоли давлатии Ҷумҳурии Тоҷикистон аз муҳимтарин рӯйдодҳои сиёсиву иҷтимоии кишвар ба ҳисоб меравад. Аз ин рӯ, омодагӣ ба ин санаи таърихӣ ҳамчун имконияти мусоид барои суръат бахшидан ба татбиқи лоиҳаҳои стратегии давлатӣ, таҳкими иқтидори иқтисодӣ, баланд бардоштани сатҳи некуаҳволии шаҳрвандон ва идомаи раванди созандагиву бунёдкорӣ дар тамоми минтақаҳои ҷумҳурӣ арзёбӣ мешавад.
АКС: Хадамоти матбуоти Президенти Ҷумҳурии Тоҷикистон