Душанбе, 13 июн, – АИ «Корвон Иттилоот». Дар пойтахти Тоҷикистон конференсияи байналмилалии соҳавии бонкҳои давлатҳои узви Созмони ҳамкории Шанхай таҳти унвони «Зеҳни сунъӣ, рақамикунонӣ, идоракунии хавфҳо ва ESG» баргузор гардид.
Чорабинӣ рӯзҳои 10–11 июн дар доираи раёсати Ҷумҳурии Тоҷикистон дар Шурои сарони ҳукуматҳои давлатҳои узви СҲШ доир шуда, ба яке аз майдонҳои муҳими муҳокимаи равандҳои нави рушди низоми молиявию бонкӣ дар минтақа табдил ёфт.
Дар кори конференсия намояндагони бонкҳои узв ва шарикони Иттиҳоди байнибонкии СҲШ, инчунин намояндагони Котиботи Созмон иштирок намуданд. Иштирокчиён масъалаҳои муҳими рушди бахши молиявию бонкиро дар шароити пешрафти босуръати технологияҳои рақамӣ мавриди баррасӣ қарор доданд.
Таваҷҷуҳи асосӣ ба татбиқи технологияҳои зеҳни сунъӣ, густариши рақамикунонӣ, такмили механизмҳои идоракунии хавфҳо ва рушди маблағгузории устувор равона гардид. Коршиносон таъкид намуданд, ки рақамикунонӣ имрӯз ба яке аз омилҳои калидии рақобатпазирии муассисаҳои молиявӣ табдил ёфтааст.
Ба гуфтаи иштирокчиён, истифодаи имкониятҳои зеҳни сунъӣ метавонад сифати хизматрасониҳои бонкиро беҳтар намуда, суръати қабули қарорҳо, таҳлили маълумоти калонҳаҷм ва самаранокии идоракунии хавфҳоро афзоиш диҳад.
Дар ҷараёни муҳокимаҳо инчунин ба масъалаҳои маблағгузории устувор таваҷҷуҳи махсус зоҳир карда шуд. Қайд гардид, ки дар шароити тағйирёбии иқлим ва таҳаввулоти иқтисодии ҷаҳонӣ, стандартҳои экологӣ, иҷтимоӣ ва идоракунӣ (ESG) ба яке аз унсурҳои муҳими фаъолияти муассисаҳои молиявӣ мубаддал гардидаанд.
Аз рӯйи натиҷаҳои конференсия ҷонибҳо омодагии худро барои рушди минбаъдаи ҳамкорӣ дар доираи Иттиҳоди байнибонкии СҲШ тасдиқ намуданд. Таъкид гардид, ки мубодилаи таҷриба, татбиқи муштараки ҳалли рақамӣ ва ҳамоҳангсозии ташаббусҳо дар самти инноватсия метавонанд ба таҳкими устувории низомҳои молиявии кишварҳои узв мусоидат намоянд.
Баргузории чунин ҳамоиши байналмилалӣ дар Душанбе бозгӯи нақши рӯзафзуни Тоҷикистон дар рушди ҳамкориҳои иқтисодию молиявии минтақавӣ мебошад. Дар шароити густариши ҳамкориҳо дар доираи СҲШ масъалаҳои рақамикунонии бахши бонкӣ ва истифодаи технологияҳои навин ба самтҳои афзалиятноки ҳамгироии иқтисодӣ табдил ёфта, барои ташаккули фазои ягонаи молиявии муосир дар қалби Авруосиё замина фароҳам меоранд.
Акс: КВД БА ҶТ «Амонатбонк»