Бишкек, 2026-жылдын 17-июну – Karavan Info маалымат агенттиги. Кыргыз Республикасынын Суу чарбасы, айыл чарбасы жана кайра иштетүү өнөр жайы министринин орун басары жана Суу ресурстары кызматынын директору Алмаз Жээналиев Өзбекстан Республикасынын Суу чарбасы министрлигине иш сапары менен барды. Бул тууралуу министрлик билдирди.

Өзбекстан Республикасынын суу ресурстары министри Шавкат Хамраев менен болгон жолугушууда суу ресурстарын башкаруу жаатындагы эки тараптуу кызматташтыктын учурдагы маселелери, ошондой эле эки өлкөнүн ортосундагы өнөктөштүктү андан ары чыңдоо келечеги талкууланды.

Сапардын жүрүшүндө кыргыз делегациясына Өзбекстан Республикасында жүргүзүлүп жаткан суу чарба реформалары, заманбап илимий иштеп чыгууларды ишке ашыруу чаралары, ошондой эле тармактык адистерди окутуу жана кесиптик жактан өнүктүрүү боюнча маалымат берилди.

Алмаз Жээналиев Суу кызматкерлеринин мектебин, китепкана комплексин жана Ирригация жана суу көйгөйлөрү боюнча илимий-изилдөө институтунун лабораторияларын кыдырып, ошондой эле композиттик материалдардан жасалган сугат каналдарын чыгарган ишканага барды.

Тараптар суу ресурстарын башкаруу жаатында кызматташууну андан ары өнүктүрүүгө, тажрыйба алмашууга жана мыкты тажрыйбаларды ишке ашырууга өз ара кызыкдар экендиктерин ырасташты.

Сүрөт: Айыл чарба министрлиги