Душанбе, 19 июн, – АИ «Корвон Иттилоот». Мақомоти шаҳри Душанбе тасмим доранд тадбирҳоро барои беҳтар намудани сифати хизматрасониҳои сайёҳӣ ва таҳкими мавқеи пойтахт ҳамчун яке аз марказҳои муҳими сайёҳии кишвар тақвият бахшанд. Ин масъалаҳо меҳвари асосии ҷаласаи навбатии Шӯрои ҳамоҳангсоз оид ба фаъолияти соҳаи сайёҳӣ назди Мақомоти иҷроияи ҳокимияти давлатии шаҳри Душанбе гардид, ки имрӯз баргузор шуд.

Муовини Раиси шаҳри Душанбе ва муовини раиси Шӯрои ҳамоҳангсоз Дилбар Одилзода зимни ифтитоҳи ҷаласа таъкид намуд, ки Шӯро дар таҳкими ҳамоҳангсозии фаъолияти сохторҳои давлатӣ ва бахши хусусӣ нақши муҳим дошта, барои рушди устувори соҳаи сайёҳии пойтахт замина фароҳам меорад.

Иштирокчиёни ҷаласа зикр карданд, ки ба шарофати сиёсати созандаи Президенти Ҷумҳурии Тоҷикистон муҳтарам Эмомалӣ Раҳмон ва ташаббусҳои пайгиронаи Раиси шаҳри Душанбе муҳтарам Рустами Эмомалӣ соҳаи сайёҳӣ тадриҷан ба яке аз бахшҳои босуръат рушдкунандаи иқтисоди миллӣ табдил меёбад. Ин соҳа дар муаррифии Тоҷикистон дар арсаи байналмилалӣ, ҷалби сармоя ва рушди соҳибкорӣ нақши рӯзафзун касб мекунад.

Сардори шуъбаи рушди сайёҳии Мақомоти иҷроияи ҳокимияти давлатии шаҳри Душанбе Дилшоди Ҷамшед оид ба рафти татбиқи барномаҳо ва лоиҳаҳои соҳавӣ ҳисобот пешниҳод намуд. Дар ҷараёни ҷаласа натиҷаҳои корҳои анҷомшуда ҷамъбаст гардида, самтҳои минбаъдаи фаъолият муайян карда шуданд.

Таваҷҷуҳи махсус ба масъалаи баланд бардоштани сифати хизматрасонӣ ба сайёҳон зоҳир гардид. Ҳолати хизматрасонӣ дар меҳмонхонаҳо, тарабхонаҳо ва марказҳои савдо, фаъолияти Фурудгоҳи байналмилалии Душанбе, сифати хизматрасониҳои нақлиёти ҷамъиятӣ ва таксӣ мавриди баррасӣ қарор гирифт. Ҳамчунин масъалаҳои омодасозӣ ва такмили ихтисоси кормандони соҳаи хизматрасонӣ ва роҳбаладони сайёҳӣ муҳокима шуданд.

Ба гуфтаи коршиносон, имрӯз сайёҳон на танҳо ба ҷойҳои таърихӣ ва табиӣ, балки ба сатҳи хизматрасонӣ, дастрасии нақлиётӣ, сифати инфрасохтори меҳмоннавозӣ ва роҳати муҳити шаҳрӣ низ баҳои ҷиддӣ медиҳанд. Аз ин рӯ, такмили инфрасохтор ва ҷорӣ намудани меъёрҳои баланди хизматрасонӣ ба омилҳои асосии рақобатпазирии самтҳои сайёҳӣ табдил ёфтаанд.

Барои Душанбе, ки ҳамасола шумораи бештари меҳмонони хориҷиро қабул мекунад, беҳтар намудани сатҳи хизматрасонии сайёҳӣ аҳамияти стратегӣ дорад. Пойтахт аллакай ба макони баргузории ҳамоишҳои байналмилалӣ, чорабиниҳои фарҳангӣ ва мусобиқаҳои варзишӣ табдил ёфтааст ва боло бурдани сифати хизматрасонӣ метавонад мавқеи онро дар харитаи сайёҳии Осиёи Марказӣ боз ҳам мустаҳкамтар намояд.

Дар анҷоми ҷаласа таъкид гардид, ки рушди ҳамаҷонибаи инфрасохтори сайёҳӣ ва беҳтар намудани сифати хизматрасонӣ минбаъд низ аз самтҳои афзалиятноки сиёсати шаҳрдорӣ боқӣ хоҳад монд.

Манбаи акс: Шуъбаи рушди сайёҳии Мақомоти иҷроияи ҳокимияти давлатии шаҳри Душанбе