Бишкек, 2026-жылдын 19-июну – Караван Инфо маалымат агенттиги. 18-июнда Кыргыз Республикасынын Президенти Садыр Жапаров Чолпон-Ата шаарында Түркиянын Улуу Улуттук Жыйынынын депутаты, Адилеттүүлүк жана өнүгүү партиясынын төрагасынын орун басары жана Түрк мамлекеттери менен байланыштар боюнча кеңсенин башчысы Куршад Зорлуну кабыл алды.

Тараптар кыргыз-түрк стратегиялык өнөктөштүгүнүн учурдагы маселелерин, парламенттер аралык кызматташтыкты өнүктүрүүнү жана саясий, соода-экономикалык, маданий-гуманитардык тармактардагы кызматташтыкты тереңдетүүнүн келечегин талкуулашты.

Президент Садыр Жапаров Кыргызстан Түркия менен кызматташууну бекемдөөгө өзгөчө көңүл буруп, эки өлкөнүн ортосундагы түзүлгөн достук жана бир туугандык мамилелерди жогору баалай турганын баса белгиледи.

Мамлекет башчысы Жогорку Кеңеш менен Түркиянын Улуу Улуттук Жыйынынын ортосундагы кызматташтыктын өнүгүп жатканын белгиледи.

Өз кезегинде Түркиянын Улуу Улуттук Жыйынынын депутаты Куршад Зорлу жылуу тосуп алгандыгы үчүн президент Садыр Жапаровго ыраазычылык билдирип, президент Режеп Тайип Эрдогандын саламын жеткирди. Ал көп жылдардан бери Кыргызстандын өнүгүшүнө кунт коюп көз салып келерин жана кыргыз-түрк мамилелеринин бекемделип жатканын көрүп кубанып жатканын белгиледи.

Куршад Зорлу акыркы жылдары эки бир тууган өлкөнүн ортосундагы кызматташтык ар тараптуу стратегиялык өнөктөштүк деңгээлине жеткенин, бул ар кандай тармактарда кызматташууну тереңдетүү үчүн жаңы мүмкүнчүлүктөрдү ачканын баса белгиледи.

Соода-экономикалык мамилелердин оң динамикасын белгилеп, ал болжол менен 1,6 миллиард АКШ долларына жеткен өз ара сооданын учурдагы көлөмүн келечекте эки өлкөнүн жетекчилигинин биргелешкен аракеттеринин аркасында 5 миллиард долларга чейин көбөйтүүгө болот деп ишенерин билдирди.

Ошондой эле, ал Кыргыз Республикасын 2027–2028-жылдарга БУУнун Коопсуздук Кеңешинин туруктуу эмес мүчөсү болуп шайланышы менен куттуктады.

Жолугушуунун жыйынтыгында тараптар кыргыз-түрк стратегиялык өнөктөштүгүн андан ары тереңдетүүгө жана өз ара кызыкчылык жараткан бардык тармактарда кызматташууну кеңейтүүгө өз ара кызыкдар экендиктерин тастыкташты.

Сүрөт: Кыргыз Республикасынын Президентинин Администрациясы