Душанбе, 20 июн, – АИ «Корвон Иттилоот». Аз 17 то 19 июн дар водии Зарафшон чорабинии муштараки фаромарзӣ оид ба мониторинги гуногунии биологӣ баргузор мегардад, ки мутахассисони минтақаҳои махсус ҳифзшавандаи табиии Тоҷикистон ва Ӯзбекистонро муттаҳид намудааст. Ташаббус ба таҳкими ҳамкории минтақавӣ дар самти ҳифзи муҳити зист ва такмили механизмҳои нигоҳдории экосистемаҳои нодири Осиёи Марказӣ равона шудааст.

Чорабинӣ бо дастгирии Барномаи минтақавии «Истифодаи ҳамгирошудаи замин бо дарназардошти тағйирёбии иқлим дар Осиёи Марказӣ», ки аз ҷониби Ҷамъияти Олмон оид ба ҳамкории байналмилалӣ (GIZ) бо супориши Ҳукумати Олмон амалӣ мегардад, ташкил шудааст.

Дар тӯли чанд рӯз мутахассисони ҳар ду кишвар дар шароити саҳроӣ таҳқиқоти муштарак анҷом дода, таҷрибаи касбиро мубодила мекунанд ва маҳорати худро дар самти мониторинги намудҳои нодир ва осебпазири набототу ҳайвонот такмил медиҳанд. Таваҷҷуҳи махсус ба ташаккули усулҳои ягонаи назорат бар вазъи экосистемаҳо равона гардидааст, зеро қисми зиёди онҳо аз марзҳои давлатӣ фаротар паҳн шудаанд.

Зимни корҳои саҳроӣ иштирокчиён баҳисобгирии намудҳои алоҳидаи олами наботот ва ҳайвонотро анҷом дода, татбиқи Дастури стандартии мониторинги гуногунии биологиро озмоиш мекунанд. Ҳамчунин масъалаҳои истифодаи технологияҳои рақамӣ барои ҷамъоварӣ, коркард ва таҳлили маълумоти экологӣ баррасӣ мешаванд.

Ба андешаи коршиносон, истифодаи усулҳои ягонаи мониторинг имкон медиҳад, ки муқоисаи маълумоти илмӣ дақиқтар гардида, низоми муассири арзёбии ҳолати захираҳои табиии минтақа ташаккул ёбад. Ин масъала махсусан дар шароити тағйирёбии иқлим, афзоиши таъсири фаъолияти инсон ва зарурати қабули қарорҳои саривақтии экологӣ аҳамияти бештар касб мекунад.

Водии Зарафшон яке аз минтақаҳои муҳими табиии Осиёи Марказӣ ба шумор меравад, ки дорои гуногунии бойи экосистемаҳо ва намудҳои нодири набототу ҳайвонот мебошад. Ҳифзи ин сарвати табиӣ амалҳои ҳамоҳангшудаи давлатҳои ҳамсояро тақозо мекунад, зеро равандҳои экологӣ ба марзҳои маъмурӣ тобеъ нестанд.

Мутахассисон таъкид мекунанд, ки ҳамкории фаромарзӣ имрӯз ба яке аз воситаҳои муассири ҳифзи гуногунии биологӣ табдил ёфтааст. Таҳқиқоти муштарак на танҳо имкони табодули таҷрибаро фароҳам меоранд, балки барои ташаккули заминаи ягонаи илмӣ ҷиҳати таҳияи стратегияҳои дарозмуддати ҳифзи табиат мусоидат мекунанд.

Интизор меравад, ки дар натиҷаи чорабинӣ тавсияҳо оид ба рушди минбаъдаи ҳамкорӣ байни муассисаҳои ҳифзи табиати Тоҷикистон ва Ӯзбекистон, инчунин пешниҳодҳо барои роҳандозии мониторинги мунтазами муштараки гуногунии биологӣ дар минтақа таҳия гарданд.

Коршиносон бар ин назаранд, ки чунин ташаббусҳо ба таҳкими амнияти экологӣ дар Осиёи Марказӣ мусоидат намуда, барои идоракунии самараноки захираҳои табиӣ дар шароити тағйирёбии глобалии иқлим заминаи устувор фароҳам меоранд.

Манбаи акс: ташкилкунандагони чорабинӣ / Барномаи GIZ.