Душанбе, 20 июн, – АИ «Корвон Иттилоот». 22 июн дар боғи «Ғалаба»-и шаҳри Душанбе ба муносибати 85-солагии оғози Ҷанги Бузурги Ватанӣ аксияи байналмилалии «Шамъҳои хотира» баргузор мегардад. Ин иқдом ҳар сол ҳазорҳо иштирокчиро дар саросари ҷаҳон муттаҳид намуда, рамзи эҳтиром ва пос доштани хотираи қурбониён мебошад.

Маркази асосии чорабинӣ дар Душанбе назди танки ИС-2 дар боғи Ғалаба ташкил мешавад, ки дар он иштирокчиён шамъҳоро ба хотири шаҳидони ҷанг меафрӯзанд. Ин амал ҳамчун рамзи умумибашарии хотира ва эҳтиром ба гузаштагон арзёбӣ мегардад.

Дар доираи чорабинӣ барномаи фарҳангӣ низ пешбинӣ шудааст. Ҳунарнамоӣ ва саҳнаҳои театрӣ аз ҷониби шогирдони студияҳои эҷодии «Хонаи русӣ» дар Душанбе пешниҳод карда мешаванд. Онҳо тавассути санъат ба рӯйдодҳои таърихӣ назар андохта, эҳтироми худро ба қаҳрамонони ҷанг иброз медоранд.

Ташкилкунандагон таъкид мекунанд, ки аксияи «Шамъҳои хотира» яке аз бузургтарин ташаббусҳои байналмилалии шаҳрвандӣ ба шумор меравад, ки ба ҳифзи хотираи таърихӣ бахшида шудааст. Хусусияти он дар ҳамоҳангии ҷаҳонӣ зоҳир мегардад, вақте ки дар кишварҳои гуногун одамон дар як рӯз шамъ меафрӯзанд.

Дар Душанбе чорабинӣ 22 июн соати 19:00 дар боғи Ғалаба оғоз мегардад. Ташкилкунандагон сокинон ва меҳмонони пойтахтро ба иштирок даъват менамоянд.

АКС: Хонаи русӣ дар Душанбе