Душанбе, 24 июн, – АИ «Корвон Иттилоот». Амалиёти густурдаи ҷустуҷӯиву наҷот дар ноҳияи Дарвоз аллакай шаш шабонарӯз боз идома дорад. Беш аз 100 корманди Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар ҷустуҷӯи раиси Вилояти Мухтори Кӯҳистони Бадахшон Алишер Мирзонабот ва чор нафари дигар, ки ҳамроҳи ӯ дар дохили нақлиёт қарор доштанд, иштирок доранд.

Тавре Кумитаи ҳолатҳои фавқулода хабар медиҳад, вазъи мураккаби гидрологии рӯди Панҷ ҳанӯз ҳам монеаи асосии пешбурди корҳои ҷустуҷӯӣ боқӣ мемонад. Баланд будани сатҳи об ва ҷараёни шадиди рӯд раванди амалиётро мушкил гардонда бошад ҳам, корҳои ҷустуҷӯӣ бидуни таваққуф идома доранд.

Ба иттилои масъулини кумита, дар маҳалли ҳодиса ситоди фаврӣ таъсис дода шудааст, ки фаъолияти ҳамаи сохторҳои ҷалбшударо ҳамоҳанг месозад. Дар амалиёт кормандони воҳидҳои Кумитаи ҳолатҳои фавқулода аз ВМКБ, минтақаи Кӯлоб ва гурӯҳҳои махсуси наҷотбахш, ки таҷрибаи кор дар рӯдҳои кӯҳиро доранд, иштирок мекунанд.

«Сатҳи об дар рӯд ҳамоно баланд буда, ҷараёни он хеле шадид аст, ки иҷрои амалиёти ҷустуҷӯиро ба таври ҷиддӣ мушкил мегардонад. Бо вуҷуди ин ҳама душвориҳо, корҳои ҷустуҷӯӣ идома доранд. Дар маҳалли ҳодиса намояндагони тамоми сохторҳои дахлдори давлатӣ ҳузур доранд. Амалиёти ҷустуҷӯӣ аз субҳи барвақт то бегоҳии дер давом мекунад», — изҳор дошт намояндаи Кумита Нозимиён.

Наҷотдиҳандагон ҳам сатҳи об ва ҳам қаъри рӯдро дар минтақаи эҳтимолии ҳодиса мавриди омӯзиш қарор медиҳанд. Ҳамзамон гурӯҳҳои ҷустуҷӯӣ қитъаҳои поёноби рӯдро низ тафтиш мекунанд, зеро хусусиятҳои ҷараёни Панҷ имкони интиқоли объектҳоро ба масофаҳои дур истисно намекунад.

Фоҷиа субҳи 17 июн дар шоҳроҳи Душанбе — Хоруғ рух дод. Тибқи маълумоти пешакӣ, автомашинае, ки дар он раиси ВМКБ Алишер Мирзонабот, ҳамсар, духтар, ёвар ва ронандаи ӯ қарор доштанд, аз роҳ берун шуда, ба рӯди Панҷ сарозер шудааст.

Аз лаҳзаҳои аввали ҳодиса ба корҳои ҷустуҷӯӣ қувваҳои хадамоти фавқулода сафарбар гардида буданд, аммо шароити табиии минтақа раванди амалиётро ба таври назаррас мушкил сохт. Хусусияти кӯҳии рӯд, суръати баланди ҷараён ва ҳаҷми зиёди об аз наҷотдиҳандагон маҳорати баланд ва истифодаи усулҳои махсуси ҷустуҷӯро талаб мекунад.

Амалиёти ҷустуҷӯиву наҷот яке аз калонтарин чунин амалиётҳо дар минтақа дар солҳои охир ба ҳисоб меравад. Бо вуҷуди гузашти рӯзҳо ва мушкилоти зиёд, кормандони хадамоти наҷот корҳои худро идома дода, аз тамоми имкониятҳои мавҷуда истифода мебаранд.

Ҷомеа низ таҳаввулоти ин ҳодисаро бо диққат пайгирӣ намуда, дар гӯшаҳои гуногуни кишвар мардум ба наздикони нафарони бедаракшуда ва кормандони хадамоти наҷот ҳамдардӣ ва пуштибонии худро изҳор мекунанд.

Акс: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон