Душанбе, 24 июн, – АИ «Корвон Иттилоот». Низоми расонидани ёрии тиббӣ ба беморони гирифтори бемориҳои саратонӣ ва гематологӣ дар Тоҷикистон бо имконияти нави технологӣ тақвият ёфт. Ба Маркази ҷумҳуриявии илмии саратоншиносӣ дастгоҳи муосири аферезии Trima Accel супурда шуд, ки метавонад самаранокии муолиҷаи беморони гирифтори бемориҳои вазнини хун ва саратонро ба таври назаррас баланд бардорад.

Таҷҳизоти нав ба шуъбаи хунгузаронии Муассисаи давлатии «Маркази ҷумҳуриявии илмии саратоншиносӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон интиқол дода шуд. Тавре вазорат хабар медиҳад, мутахассисони марказ аллакай омӯзиши заруриро гузашта, истифодаи амалии дастгоҳро оғоз намудаанд.

Бартарии асосии ин таҷҳизот дар он аст, ки ҳоло он ягона дастгоҳи чунин навъ дар Тоҷикистон ба ҳисоб меравад. Технологияи аферез имкон медиҳад, ки ҷузъҳои зарурии хун бевосита аз донор гирифта шуда, ба қисмҳои алоҳида ҷудо ва унсурҳои муҳимтарини он барои истифодаи минбаъдаи тиббӣ интихоб гарданд.

Бо истифода аз низоми Trima Accel хуни донор ба таври худкор коркард шуда, баъдан ҷузъҳои алоҳидаи он, аз ҷумла массаи тромбоцитӣ, дар халтаҳои махсус ҷамъоварӣ карда мешаванд ва мувофиқи нишондоди тиббӣ ба беморон гузаронида мешаванд.

Ин технология махсусан барои бемороне аҳамияти калон дорад, ки аз муолиҷаи шадиди бемориҳои саратонӣ мегузаранд. Пас аз курсҳои кимиётерапия бисёре аз беморон бо коҳиши шадиди тромбоцитҳо ва вайроншавии қобилияти лахташавии хун рӯ ба рӯ мешаванд, ки хатари хунравиҳои ҷиддиро зиёд мекунад.

Аллакай аввалин ҳолати муваффақонаи истифодаи дастгоҳ ба қайд гирифта шудааст. Барои кӯдаке, ки баъд аз кимиётерапия ба ислоҳи фаврии нишондиҳандаҳои хун ниёз дошт, маводи донорӣ тавассути низоми нав гирифта ва поксозӣ карда шуд. Пас аз ворид намудани тромбоцитҳои аферезӣ вазъи бемор беҳтар гардид.

Ба гуфтаи мутахассисон, яке аз бартариҳои муҳими дастгоҳ истифодаи самараноки хуни донорӣ мебошад. Ҷузъҳое, ки аз як донор гирифта мешаванд, метавонанд барои кумак ба то се бемор истифода шаванд, ки аз хунравӣ, бемориҳои саратонӣ, онкогематологӣ ва дигар бемориҳои хун ранҷ мебаранд.

Пайдо шудани чунин таҷҳизот ҳамчун қадами муҳим дар роҳи навсозии хадамоти саратоншиносии кишвар арзёбӣ мешавад. Дар шароите, ки талабот ба хизматрасониҳои муосири тиббӣ афзоиш меёбад, ҷорӣ намудани технологияҳои пешрафтаи коркарди ҷузъҳои хун на танҳо сифати табобатро беҳтар мекунад, балки имкониятҳои низоми тандурустии Тоҷикистонро барои расонидани ёрии махсусгардонидашуда ба беморони вазнин низ васеъ мегардонад.

Акс: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон