Душанбе, 01 июл, – АИ «Корвон Иттилоот». Бо ташаббус ва дастгирии ҳамаҷонибаи Мақомоти иҷроияи ҳокимияти давлатии шаҳри Душанбе рӯзҳои 24–26 сентябри соли 2026 дар пойтахти Тоҷикистон ду чорабинии муҳими соҳавӣ: «Намоишгоҳи байналмилалии сайёҳии Душанбе – 2026» (Dushanbe International Tourism Exhibition – DITE-2026) ва Форуми байналмилалии Душанбе таҳти унвони «Ҳамгироии шаҳрҳо дар татбиқи имкониятҳои сайёҳии устувор» баргузор мегарданд. Қарори дахлдор аз ҷониби Раиси шаҳри Душанбе ба тасвиб расидааст.
Мувофиқи ҳуҷҷати тасдиқшуда, барои ҳамоҳангсозии омодагӣ ва баргузории чорабиниҳои мазкур шуъбаи рушди сайёҳии Мақомоти иҷроияи ҳокимияти давлатии шаҳри Душанбе масъул муайян шудааст. Инчунин Кумитаи тадорукот дар ҳайати муовинони Раиси шаҳр, роҳбарони сохторҳои дахлдор, мақомоти ҳифзи ҳуқуқ ва намояндагони вазорату идораҳои марбутаи ҷумҳурӣ таъсис дода шуд.
Ин чорабиниҳои байналмилалӣ, ки ҳамасола бо дастгирии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бахшида ба Рӯзи ҷаҳонии сайёҳӣ баргузор карда мешаванд, ба рушди сайёҳии устувор, густариши ҳамкории байнишаҳрӣ, ҷалби сармоягузорӣ, табодули таҷриба ва муаррифии имкониятҳои сайёҳии Тоҷикистон, бахусус пойтахти мамлакат мусоидат менамоянд.
Имсол дар Форуми байналмилалии Душанбе иштироки доираи васеи делегатҳо дар назар аст:
- Намоишгоҳо ва намояндагони бахши сайёҳии бародаршаҳрҳо ва шаҳрҳои шарики Душанбе;
- Вазорату идораҳои соҳавии кишварҳои минтақа ва созмонҳои байналмилалӣ;
- Доираҳои илмӣ, сармоягузорон ва донорҳои байналмилалӣ;
- Ширкатҳои сайёҳӣ ва дигар субъектҳои хизматрасонии соҳа.
Дар ҷараёни форум масъалаҳои рушди сайёҳии устувор, ҷалби сармоягузорӣ, татбиқи лоиҳаҳои муштарак, рушди шарикӣ миёни шаҳрҳо баррасӣ гардида, дар фарҷоми он санадҳои нави ҳамкорӣ байни доираҳои манфиатдор ба имзо мерасанд. Намоишгоҳи DITE-2026 бо дастгирии Мақомоти иҷроияи шаҳр аз ҷониби ҶДММ «Сомон Трэвел» ташкил ва баргузор карда мешавад.
Платформаи DITE динамикаи устувори рушдро нишон медиҳад. Дар ду давраи баргузории он — солҳои 2024 ва 2025 — 290 субъекти соҳаи сайёҳӣ, аз ҷумла 85 ширкати хориҷӣ аз 18 кишвари ҷаҳон иштирок намуданд. Дар доираи DITE-2026 баргузории вохӯриҳои соҳибкорон дар шакли B2B, тренингҳои омӯзишӣ оид ба баланд бардоштани сифати хизматрасонӣ дар меҳмонхонаҳо ва тарабхонаҳо, такмили маҳорати касбии роҳбаладон ва таҳияи хатсайрҳои нави сайёҳӣ пешбинӣ шудааст. Рӯзномаи кориро намоишгоҳи аксҳо, барномаи фарҳангӣ ва хатсайрҳои сайёҳӣ ба мавзеъҳои таърихиву фароғатии пойтахт пурра хоҳанд кард.
DITE-2026 — ин на танҳо эҳтиром ба тақвими байналмилалии ҷашнҳо, балки як қисми стратегияи дақиқи иқтисодии Рустами Эмомалӣ ҷиҳати диверсификатсияи даромадҳои пойтахт мебошад. Гузариш аз дарки ашёии потенсиали минтақаҳо ба сармоякунонии сайёҳии урбанистӣ — тамоюли умумиҷаҳонӣ аст ва Душанбе ба ин архитектура ба таври фаврӣ ворид шуда истодааст. Ин факт, ки дар давоми ду сол форум қариб сесад иштирокчиро, аз ҷумла намояндагони 18 давлатро ҷамъ овард, исбот мекунад, ки бренди Душанбе ҳамчун маркази бехатар, аз ҷиҳати логистикӣ қулай ва аз фарҳанг бой эътироф гардидааст.
Нишондиҳандаи асосии таҳлилии форуми оянда — таваҷҷуҳ ба «ҳамгироии шаҳрҳо» мебошад. Дар шароити муосир, созишномаҳои классикии байнидавлатӣ аксар вақт ҳамоҳангсозии тӯлонии бюрократиро талаб мекунанд, дар ҳоле ки алоқаҳои мустақими горизонталӣ байни мақомоти шаҳрдорӣ ва тиҷорати сайёҳӣ (шакли B2B) зуд ва самаранок кор мекунанд.
Баргузории тренингҳои махсус барои роҳбаладон ва рестараторҳо бевосита дар майдонҳои намоишгоҳ гувоҳӣ медиҳад, ки роҳбарияти шаҳр нуқтаҳои заифи соҳаро хуб мебинад ва норасоии кадрҳои соҳибихтисосро ба таври системӣ бартараф намуда, пойтахтро барои қабули босифати сайёҳони сатҳи баланд омода месозад.
АКС: Мақомоти иҷроияи ҳокимияти давлатии шаҳри Душанбе