Душанбе, 01 июл, – АИ «Корвон Иттилоот». Ҳамкории Ҷумҳурии Тоҷикистон ва Ҷумҳурии Корея ба марҳилаи нави сифат ворид мешавад, ки дар он технологияҳои инноватсионӣ, иқтисоди рақамӣ ва таҳкими амнияти озуқаворӣ ба драйверҳои калидӣ табдил меёбанд.
Ҳафтаи гузашта Барномаи озуқавории ҷаҳонии СММ (БОҶ) дар Тоҷикистон ҳайати расонаҳои хабарии Агентии иттилоотии “Йонҳап”-и Ҷумҳурии Кореяро қабул намуд. Сафари мазкур дар доираи омодагии ҳамаҷонибаи иттилоотӣ ба Саммити дарпешистодаи «Ҷумҳурии Корея – Осиёи Марказӣ», ки баргузории он дар моҳи сентябри соли ҷорӣ пешбинӣ шудааст, ташкил гардид.
Таваҷҷуҳи асосии рӯзноманигорони хориҷӣ ба арзёбии самаранокии барномаҳои муштараки БОҶ СММ ва Агентии Корея оид ба ҳамкориҳои байналмилалӣ (KOICA) нигаронида шуд. Ин ташаббусҳо ба рушди соҳаи кишоварзии Тоҷикистон бо таваҷҷӯҳи махсус ба тавонмандсозии деҳқонони ҷавони хоҷагидор тавассути ҳалли технологияҳои кишоварзӣ, рушди малакаҳо ва мустаҳкам намудани занҷирҳои арзиш равона карда шудаанд.
Зимни суҳбати расмӣ бо муовини вазири кишоварзии Ҷумҳурии Тоҷикистон Нигина Анварӣ, ҷонибҳо аҳамияти критикии ворид намудани технологияҳои муосирро дар истеҳсолоти имрӯза баррасӣ карданд. Муовини вазир барои дастгирии системӣ аз ҷониби KOICA ва БОҶ дар пешбурди равишҳои рақамӣ ва инноватсионии соҳаи кишоварзӣ, ки имкон медиҳанд ҳосилнокӣ ва самаранокии хоҷагиҳои деҳқонӣ ба таври назаррас баланд бардошта шавад, изҳори миннатдорӣ намуд.
Таъкид гардид, ки Душанбе ҳамкории зичи Ҷумҳурии Кореяро дар саросари Осиёи Марказӣ истиқбол намуда, Саммити дарпешистодаро ҳамчун як имконияти муҳими стратегӣ арзёбӣ мекунад.
Барои мушоҳидаи натиҷаҳои амалии лоиҳа, ҳайати расонаҳои хабарии Кореяи Ҷанубӣ ба ноҳияи Рӯдакӣ (ҷамоати Чоргултеппа) сафар кард. Намояндагони хориҷӣ дар он ҷо аз маконҳои омӯзиш дидан намуда, бо деҳқонону мураббиёни ҷавон мулоқот карданд ва бевосита мушоҳида намуданд, ки чӣ гуна донишу навовариҳои амалӣ амнияти озуқаворӣ ва некуаҳволии деҳотро таҳким мебахшанд.
Сафари агентии “Йонҳап” нишон медиҳад, ки Кореяи Ҷанубӣ стратегияи худро дар Осиёи Марказӣ тағйир медиҳад: ба ҷои сармоягузориҳои умумӣ, Сеул интиқоли дақиқи технологияҳои муосирро (smart farming) пешниҳод мекунад. Барои Тоҷикистон, ки бахши кишоварзӣ қисми зиёди қувваи кориро фаро мегирад, аммо аз сатҳи пасти технологӣ азият мекашад, ин як шанси стратегӣ аст. Дастгирии маҳз деҳқонони ҷавон тавассути KOICA — ин сармоягузорӣ ба ивазшавии авлод дар деҳот ва табдил додани деҳқони оддӣ ба оператори соҳибихтисоси агробизнес мебошад.
Лоиҳаҳои муштараки БОҶ СММ ва Кореяи Ҷанубӣ дар ҷамоати Чоргултеппа исбот мекунанд, ки амнияти озуқаворӣ на бо васеъ кардани майдонҳо, балки бо афзоиши арзиши иловашуда ва оптимизатсияи занҷирҳои логистикӣ ба даст меояд.
Саммити дарпешистодаи моҳи сентябр «Корея — Осиёи Марказӣ» барои мустаҳкам кардани ин муваффақият нигаронида шудааст. Барои Тоҷикистон муҳим аст, ки ин майдонро барои тавсеаи таҷрибаи ноҳияи Рӯдакӣ ба тамоми ҷумҳурӣ истифода бурда, ширкатҳои бузурги технологии Кореяро ба сохтани харитаҳои рақамии замин, низомҳои обёрии қатрагии насли нав ва марказҳои автоматикунонидашудаи логистикӣ ҷалб намояд.
ФОТО: World Food Programme in Tajikistan