ООГАНИСТАН, 2026-жылдын 2-июлу – Karavan Info маалымат агенттиги. Канберрадагы мурдагы Ооганстан Республикасынын өкүлү болгон Ооганстандын элчилиги Австралия өкмөтүнүн чечимине ылайык консулдук кызматтарды токтотууну жарыялады.

1-июлда жарыяланган билдирүүдө консулдук бөлүмүнүн иши кабыл алуучу өлкөнүн чечими менен токтотулганы айтылат.

Кечээ Австралиянын Тышкы иштер министрлиги жана Канберрадагы Ооганстан элчилиги биргелешкен билдирүү жасап, 2026-жылдын 30-июнунан кийин дипломатиялык миссиянын ишмердүүлүгү толугу менен токтотулаарын жарыялашты.

Документте Австралия Талибан администрациясын Ооганстандын мыйзамдуу өкмөтү катары тааныбай турганы жана анын өкүлдөрүн өз аймагында кабыл албай турганы баса белгиленет.

"Австралия жана Канберрадагы Ооганстан элчилиги Ооганстан элине берилген бойдон калууда. Биз Талибанды ооган элинин мыйзамдуу өкүлдөрү катары тааныбайбыз", – деп айтылат билдирүүдө.

Тараптар ошондой эле талибдердин адам укуктарын, айрыкча аялдар менен кыздарга карата системалуу түрдө бузууларын айыпташты. Билдирүүдө оогандардын кадыр-баркын жана негизги укуктарын коргоого болгон милдеттенмелери тастыкталды.

Документтин авторлорунун айтымында, элчиликти жабуу чечими Австралия өкмөтү менен консультациялардан кийин, дипломатиялык миссиянын көзөмөлүнөн тышкары узакка созулган көйгөйлөр жана чектөөлөрдөн улам кабыл алынган.

Австралия элчиликтин имаратын, анын мүлкүн жана архивдерин Дипломатиялык мамилелер жөнүндөгү Вена конвенциясына жана эл аралык укукка ылайык коргоону камсыз кылаарын билдирди.

Сүрөт: Atlas Press