Душанбе, 04 июл, – АИ «Корвон Иттилоот». Дар шароите, ки технологияҳои зеҳни сунъӣ босуръат рушд мекунанд, масъалаи омода намудани мутахассисони насли нав ба яке аз омилҳои муҳими рақобатпазирии иқтисод ва низоми маориф табдил ёфтааст.

Маҳз ба ин мавзуъҳо семинари «Зеҳни сунъӣ: Касбҳои оянда» бахшида мешавад, ки хонандагони синфҳои болоӣ, донишҷӯён ва ҳамаи хоҳишмандонро гирди ҳам меорад.

Иштирокчиёни чорабинӣ имконият пайдо мекунанд, ки бо тамоюлҳои нави рушди зеҳни сунъӣ, тағйироти бозори меҳнат ва талабот ба мутахассисоне, ки дар солҳои наздик бештар талабгор хоҳанд шуд, шинос гарданд.

Дар доираи семинар масъалаҳои марбут ба равандҳои асосии рушди технологияҳои зеҳни сунъӣ, таҷрибаи амалии истифодаи ИИ дар бахшҳои гуногуни иқтисодиёт ва мутобиқсозии низоми маориф ба талаботи нави бозори меҳнат мавриди баррасӣ қарор мегиранд. Ҳамчунин ба малакаҳо ва салоҳиятҳое таваҷҷуҳи махсус дода мешавад, ки ҷавонон бояд аз имрӯз барои муваффақ шудан дар фаъолияти касбии оянда аз худ намоянд.

Суханрони асосии чорабинӣ Татяна Сибизова — профессор, доктори илмҳои педагогӣ ва роҳбари Раёсати технологияҳои таълимӣ ва табдили рақамии таълими Донишгоҳи давлатии техникии Москва ба номи Н.Э. Бауман мебошад. Коршинос таҷрибаи яке аз донишгоҳҳои пешрафтаи техникии Русияро дар омодасозии мутахассисон барои соҳаҳои баландтехнологӣ муаррифӣ хоҳад кард.

Қисмати алоҳидаи семинар ба имкониятҳои таҳсил дар нахустин филиали хориҷии Донишгоҳи давлатии техникии Москва ба номи Н.Э. Бауман бахшида мешавад. Иштирокчиён метавонанд дар бораи барномаҳои таълимӣ, ихтисосҳои пешниҳодшаванда ва дурнамои гирифтани таҳсилоти муҳандисии сатҳи байналмилалӣ маълумоти муфассал ба даст оранд.

Ба андешаи коршиносон, баргузории чунин чорабиниҳо ба баланд бардоштани саводнокии рақамии ҷавонон, ташаккули ҷаҳонбинии технологӣ ва интихоби дурусти касб дар шароити иқтисоди рақамӣ мусоидат намуда, барои омодасозии мутахассисони ҷавобгӯ ба талаботи бозори меҳнати оянда заминаи мусоид фароҳам меорад.

АКС: Хонаи русӣ дар Душанбе