Душанбе, 06 июл, – АИ «Корвон Иттилоот». Тоҷикистон таҳкими заминаи илмиро барои татбиқи сиёсати рушди «иқтисоди сабз» ва таҳкими истиқлоли энергетикӣ идома медиҳад.
Қадами навбатӣ дар ин самт мавриди истифода қарор гирифтани Озмоишгоҳи муштараки омӯзиш ва татбиқи манбаъҳои барқароршавандаи энергия-и Академияи миллии илмҳои Тоҷикистон дар назди ҶСК «Системавтоматика» мебошад, ки 3 июл дар шаҳри Душанбе ифтитоҳ гардид.
Дар маросими ифтитоҳи озмоишгоҳ Президенти Академияи миллии илмҳои Тоҷикистон, академик Қобилҷон Хушвахтзода, олимону муҳаққиқон, инчунин намояндагони вазорату идораҳои соҳавӣ иштирок намуданд.
Тавре зимни ифтитоҳ таъкид гардид, таъсиси озмоишгоҳи мазкур дар доираи татбиқи сиёсати давлатии Ҷумҳурии Тоҷикистон оид ба рушди «энергияи сабз», густариши истифодаи манбаъҳои барқароршавандаи энергия ва иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ гардидааст.
Озмоишгоҳи нав ба маркази таҳқиқ, озмоиш ва татбиқи амалии технологияҳои муосири энергетикӣ табдил хоҳад ёфт. Он барои гузаронидани таҳқиқоти фундаменталӣ ва амалӣ дар самти истифодаи неруи офтоб, санҷиши технологияҳои инноватсионӣ, омодасозии мутахассисони баландихтисос ва ворид намудани дастовардҳои илмӣ ба истеҳсолот имкониятҳои нав фароҳам меорад.
Самти асосии фаъолияти озмоишгоҳ ба омӯзиши иқтидори манбаъҳои барқароршавандаи энергия, баланд бардоштани самаранокии системаҳои офтобӣ, мутобиқсозии технологияҳои пешрафта ба шароити табиӣ ва иқлимии Тоҷикистон, таҳияи тавсияҳои илмӣ барои рушди соҳаи энергетика ва татбиқи натиҷаҳои таҳқиқот дар амалия равона карда мешавад.
Ба андешаи коршиносон, мавриди истифода қарор гирифтани ин озмоишгоҳ робитаи илм ва истеҳсолотро ба сатҳи сифатан нав мебарорад. Он ҳамчун платформаи муассири татбиқи технологияҳои инноватсионӣ, тиҷоратикунонии натиҷаҳои илмӣ ва омодасозии муҳандисону муҳаққиқони насли нав хизмат хоҳад кард.
Дар Академияи миллии илмҳои Тоҷикистон таъкид мекунанд, ки татбиқи чунин лоиҳаҳо ба сиёсати стратегии мамлакат дар самти таҳкими амнияти энергетикӣ, рушди технологияҳои аз ҷиҳати экологӣ тоза ва ташаккули модели рақобатпазири «иқтисоди сабз», ки бар дастовардҳои муосири илмӣ асос ёфтааст, пурра мутобиқ мебошад.
Интизор меравад фаъолияти озмоишгоҳи муштарак ба суръат бахшидани ҷорӣ намудани технологияҳои нав дар соҳаи энергетика, истифодаи самараноки захираҳои табиӣ ва таҳкими таъминоти илмии барномаҳои стратегии давлатии рушди устувор мусоидат намояд.
Акс: Академияи миллии илмҳои Тоҷикистон