Душанбе, 06 июл, – АИ «Корвон Иттилоот». Федератсияи варзиши электронии Тоҷикистон дар ҳамкорӣ бо Раёсати Вазорати корҳои дохилии Ҷумҳурии Тоҷикистон дар шаҳри Душанбе аз 24 то 26 июл мусобиқаи киберварзишӣ барои дарёфти «Ҷоми Душанбе»-ро баргузор менамояд. Ин мусобиқа яке аз бузургтарин рақобатҳои ҳаводорони варзиши электронӣ дар ҷумҳурӣ ба ҳисоб меравад.

Мусобиқа дар маркази бозиҳои электронии «Мардон» баргузор шуда, дар давоми се рӯз дастаҳои беҳтарин барои дарёфти Ҷоми пойтахт ва фонди умумии ҷоизаҳо ба маблағи 60 ҳазор сомонӣ рақобат хоҳанд кард.

Ташкилкунандагон таъкид мекунанд, ки баргузории ин мусобиқа ба рушди минбаъдаи варзиши электронӣ дар Тоҷикистон, густариши интизоми рақамӣ миёни ҷавонон, дастгирии бозигарони боистеъдод ва ташаккули фарҳанги иштироки масъулона дар мусобиқаҳои киберварзишӣ равона шудааст.

Ба иштирок танҳо дастаҳои ҳаводор роҳ дода мешаванд, ки ҳамаи аъзои онҳо ба синни 18-солагӣ расида бошанд. Интизор меравад мусобиқа намояндагони минтақаҳои гуногуни мамлакатро муттаҳид намуда, барои дарёфти варзишгарони ояндадоре, ки метавонанд Тоҷикистонро дар мусобиқаҳои байналмилалии киберварзишӣ намояндагӣ кунанд, замина фароҳам оварад.

Дар солҳои охир варзиши электронӣ дар Тоҷикистон бо суръати устувор рушд мекунад. Баргузории мусобиқаҳои бузурги миллӣ ба таҳкими инфрасохтори соҳа, густариши ҳаракати варзишии ҷавонон ва ҳамгироии Тоҷикистон ба ҷомеаи ҷаҳонии киберварзиш мусоидат менамояд.

Акс: Федератсияи варзиши электронии Тоҷикистон