Душанбе, 08 июл, – АИ «Корвон Иттилоот». Аз 5 то 9 июли соли 2026 дар шаҳри Ставропол Форуми байналмилалии ҷавонони донишгоҳҳои славянӣ баргузор мегардад, ки намояндагони донишгоҳҳои русию миллӣ (славянӣ)-и кишварҳои ИДМ-ро ба ҳам овардааст.

Ин майдон ба як фазои муҳими баррасии форматҳои нави ҳамкории ҷавонон, таҳкими робитаҳои шарикӣ ва таҳияи ташаббусҳои муштарак дар фазои таҳсилотии Авруосиё табдил ёфтааст.

Донишгоҳи славянии Тоҷикистону Русияро дар форум муовини ректор оид ба корҳои тарбиявӣ Марина Васильевна Русакова, мутахассиси пешбари шуъбаи байналмилалӣ Саида Каримовна Шарипова, инчунин донишҷӯёни ҳамаи факултетҳои донишгоҳ намояндагӣ мекунанд. Иштироки ҳайати ДСТР мавқеи фаъоли ин муассисаи таҳсилоти олӣ дар равандҳои байналмилалии таълимӣ ва башардӯстона, инчунин нақши онро дар густариши гуфтугӯи ҷавонони кишварҳои ИДМ нишон медиҳад.

Форум дар заминаи Донишгоҳи федеролии Қафқози Шимолӣ баргузор шуда, минтақае интихоб гардидааст, ки бо таркиби бисёрмилливу гуногунқавмии худ фарқ мекунад. Маҳз ҳамин омил ба чорабинӣ аҳамияти махсус мебахшад: гуфтугӯи ҷавонон дар ин ҷо на танҳо ҳамчун ташаббуси академӣ, балки ҳамчун воситаи амалии таҳкими ҳамдигарфаҳмӣ миёни намояндагони фарҳангҳо, забонҳо ва анъанаҳои гуногуни таҳсилотӣ рушд мекунад.

Ташкилкунандагон ҳадафи асосии форумро дар ҳамоҳангсозии талошҳои донишгоҳҳои русию миллӣ (славянӣ)-и давлатҳои ИДМ дар самти рушди ҳамкории созандаи байналмилалии ҷавонон муайян кардаанд. Дар маркази таваҷҷуҳ — муттаҳид намудани донишҷӯён, мутахассисони ҷавон ва роҳбарони созмонҳои ҷавонон аз Русия, Беларус, Арманистон, Қирғизистон ва Тоҷикистон қарор дорад. Чунин қолаб ба бунёди робитаҳои устувори мустақим миёни донишгоҳҳо ва таҳкими замина барои лоиҳаҳои муштараки оянда мусоидат менамояд.

Барномаи форум лексияҳои омӯзишӣ, муҳокимаҳои мавзӯӣ, сессияҳои стратегии корӣ, чорабиниҳои фарҳангӣ ва корҳои дастаҷамъонаро фаро мегирад. Ҳамҷоя шудани шаклҳои назариявӣ ва амалӣ ба рушди малакаҳои роҳбарӣ, таҳкими муколамаи байнифарҳангӣ ва ташаккули фазои ягонаи ҳамкории ҷавонон равона шудааст. Дар шароити имрӯза маҳз чунин ташаббусҳо ба як ҷузъи муҳими «қувваи нарм» дар соҳаи маориф ва робитаҳои башардӯстонаи байнидавлатӣ табдил меёбанд.

Барои Донишгоҳи славянии Тоҷикистону Русия иштирок дар форум на танҳо аҳамияти намояндагӣ, балки хусусияти амалии низ дорад. Он имкониятҳои навро барои табодули академӣ, густариши ҳамкории шарикӣ миёни донишгоҳҳои славянӣ ва пешбурди лоиҳаҳои ояндадори ҷавонон, ки метавонанд дар сатҳи Авруосиё рушд ёбанд, фароҳам меорад.

Ба ин маъно, форуми Ставропол на як майдони якдафъаинаи мулоқот, балки як ҳалқаи муҳими раванди васеътари таҳкими ҳамгироии таълимӣ дар фазои ИДМ мебошад.

Акс: Хадамоти матбуоти Донишгоҳи славянии Тоҷикистону Русия